Berisha i penduar: Rama luajti me koalicionin, Basha po flinte gjumë

Gjatë mbrëmjes së sotme, Berisha ka zgjedhur që të mos hesht më, e në të njëjtën kohë të reflektojë për periudhën para dhe pas zgjedhore dhe dështimin fatal që pësuan. Ai ngriti në piedestal Ramën, ku sipas tij, u tregua shumë vigjilent në lidhje me arritjen e një pakti, e nga ana tjetër, Basha u tregua i vonuar. Ai nuk la pas edhe këshilltarët e Bashës, duke i cilësuar si mizerabël.

Çim Peka: Ditën që Lulzim Basha ka hapur fushatën, keni qenë shumë optimist. Më keni thënë që ky mund të jetë fjalimi më i mirë i tij në jetën e tij politike. Më keni thënë se nëse Basha vazhdon kështu për 10 ditë, Rama mbyllet në shtëpi. Pavarësisht që isha shumë skeptik, për fjalimin e Fierit pasi e pashë, ndaja plotësisht mendimin, por isha i bindur që ai nuk të bënte këtë gjë. Ai nuk e bëri. A besoni se Basha mund ti kthehet rrugës së opozitës pa kompromis ndaj kundërshtarit? 

Fillimin e pati shumë të mirë, i shkëlqyer. Vështirësitë e listës ishin të padiskutueshme. Po ti kthehemi IPR-së , i cili për ne tragjikisht, por për të vërtetën u faktua milimetrik, ajo javë në vazhdim PD u ngjit me 5 pikë, nga 32 në 37.6%. Çfarë do të thoshte kjo? Kjo do të thoshte se PD-ja, po të ecte në këtë mënyrë do të tërhiqte si magnet të pavendosurit. Me Edi Ramën kishte 7 pikë diferencë, por ritmi i rritjes 5 pikë në javë PD-në e nxirrte pa diskutim parti të parë. Çfarë ndodhi? Për mua ndodhi fataliteti.

Edi Rama me mjeshtri diabolike filloi, përvetësoi marrëveshjen dhe hapi në të katër anët e Shqipërisë me çdo gjë edhe me militantë të thjeshtë se “ne do të bëjmë koalicion”. Këtu kryetari i PD-së u tregua i vonuar.

Nuk e kuptoi që kjo ishte një puthje fatale për ne. Çfarë ndodhi në polin tjetër. Jo vetëm rënia me 6%, por diçka shumë më e rëndë. U rritën nga 26.7 në 34.6 ata që nuk do të votonin. Pra blloku kryesisht militant i PD-së na u largua nga fushata. Ju po bëni koalicion, ne nuk kemi më punë me ju.

Militantët janë aq sa janë jetik për fitoren, aq janë dhe të hiperndjeshëm dhe pastaj, kur menduan se kjo mund të ndodhte, thanë ne s’kemi punë me këtë fushatë, sepse ne mbajtëm çadrën 90 ditë, etj., ndërsa ata po bëjnë koalicionin. Ata nuk janë dakord me koalicionin. Kështu që u rrit në mënyrë paradoksale bojkoti i zgjedhjeve. Të ngrohje këta 10 % duhej ti hyje detit në këmbë. Mund të bëhej, por ishte shumë vështirë. Lulzim Basha kishte këshilltarë mizerabël elektoralë, mizerabël”.