Prapaskenat/ Berisha ‘shkarkon’ Gridën si zëdhënëse të grupit të PD-së?

Ditën e sotme në sallën e seancave plenare, demokratët u informuan në kohë reale për çdo lëvizje nga kundërshtari politik.

Dalja për media e Taulant Ballës, që mohonte përdorimin e fjalorit fyes të Edi Ramës ndaj ish-liderit të tyre vuri në lëvizje të djathtët.

“BalkanWeb” ka zbardhur diskutimin e zhvilluar mes demokratëve për personin që do të replikonte me kryetarin e grupit socialist. Në mbledhjen e ngushtë u propozua që Enkelejd Alibeaj, nënkryetari i grupit të dilte e t’u përgjigjej akuzave të socialistëve publikisht.

Propozimi mori “pëlqimin” e ish-kryeministrit edhe pse nuk e pohoi me zë, por mesa duket Lulzim Basha kishte një tjetër emër në mendje.

Ai thirri zëdhënësen e grupit Grida Duma, të afrohet. Emri i Grida Dumës nuk ka lënë indiferent Sali Berishën, i cili i është drejtuar Bashës me fjalët: “Jo, jo, lëre fare”, duke lënë të kuptohet se nuk është dakord që Grida të flasë për mediat.

Ndërkohë zëdhënësja e grupit i është përgjigjur menjëherë thirrjes së kryetarit dhe është afruar, por nuk i ka komunikuar asgjë dhe është kthyer mbrapsht sërish, ndërsa Sali Berisha është çuar nga vendi i tij.