Kryeprokurori/ Opozita bojkoton komisionin, mazhoranca vendos e vetme

Dy ftesave të kryeministrit Rama për bashkëpunim në zgjdhjen e një prokurori të ri të përgjithshëm me konsensus, kreu i PD, Basha i është përgjigjur negativsht. Të ndodhur para kësaj situate maxhoranca ka miratuar vetëm me votat e saj një projektvendim për të nisur procedurat për zgjedhjen e një prokurori të përkohshëm. Projekt vendimi u lexua nga Blendi Çuçi në Komisionin e Ligjeve gjë e cila ka shkaktuar edhe reagim të ashpër nga ana e deputetëve të opozitës.

Pas rreth 3 orësh mbledhje dhe debate të shumta, deputetët e PD-së dhe LSI-së u larguan nga mbledhja duke akuzuar shumicën se po zgjedh një Prokuror të Përkohshëm për të kapur këtë institucion dhe për të rregulluar disa dosje korrupsioni të eksponentëve të saj politik.

Nga ana tjetër shumica e argumenton këtë me faktin se Prokuroria kërkon patjetër një drejtues prej ditës së nesërme duke qenë se Llallës i përfundon mandati.

Debati në Komisionin e Ligjeve

Ulsi Manja: Komisioni i Ligjeve sot do të vendosë çeljen e procedurave për miratimin, përcaktimin e prokurorit të Përgjithshëm të përkohshëm sipas kritereve të përcaktuara në ligj.

Bledi Cuci: Komisioni i ligjeve pasi u njoh me memon e sekretarit të Përgjithshëm të Kuvendit, pasi konstatoi se Këshilli i Lartë i Prokurorisë nuk është konstituar ende, pasi u njoh me memon e Shërbimit të Monitorimit, pjesë e Kuvendit, vendosi: 1. Miratimin e procedurës së prokurorit të përgjithshëm të përkohshëm. A) komisioni i ligjeve fton prokurorët me më shumë eksperiencë nga radhët e prokurorëve që brenda 5 ditëve të depozitojnë një CV të kandidatit. B) menjëherë pas depozitimit të listës, komisioni përgjegjës bën publikimin e saj dhe cakton datën për zhvillimin e seancës. C) pas zhvillimit të seancës komisioni i ligjeve shqyrton dokumentacionin dhe harton raportin për seancën plenare. D) Kuvendi voton për caktimin e Prokurorit të Përgjithshëm të përkohshëm.

Genc Gjonçaj (sekretar i përgjithshëm i Kuvendit): Në asnjë rast ne nuk kemi thënë që kuorumi për zgjedhjen e Prokurorit kërkon 84 vota. Kjo është për tu qartësuar. Ajo që keni në tryezë ka të bëjë vetëm me dy memo: e para ka të bëjë me konstatimin e vakancës së prokurorit të Përgjithshëm. Ne nuk vlerësojmë nëse Prokurori i Përkohshëm duhet të zgjidhet me 84, 71 apo 16 vota. Jeni ju që do orientoni Kuvendin. Memo e dytë ka të bëjë me faktin e moskrijimit të KLP-së.

Enkelejd Alibeaj: Interesi i medieve dhe publikut tregon se diçka e pazakontë po ndodh. Ju po filloni procedurën për të emëruar prokurorin e përgjithshëm të Shqipërisë. Kjo nuk është tentativë, por është fakt që maxhoranca po kërkon të kapë Prokurorin e Përgjithshëm. Kushdo e kupton këtë. Ju mund të keni probleme personale me Adriatik Llallën, por kam përshtypjen se mund të keni më shumë probleme me dosjet që Adriatik Llalla po çon përpara. Ftesa ime është që ti thërrasim arsyes dhe të pozicionohemi jo përkundrejt një individi, por që ti thërrasim arsyes. Ftesa është edhe politike sepse në qoftë se do të hidhni këtë hap të gabuar kushtetues dhe mbi të gjitha politik, do të acaroni klimën politike në vend, kur nuk ka arsye për ta bërë.