Meta pret deputetët britanikë: Bashkëpunim më i ngushtë në luftën kundër trafiqeve të qenieve njerëzore

Presidenti i Republikës, Ilir Meta, ditën e sotme ka organizuar një takim me grupin e deputetëve britanikë, anëtarë të Grupit të Unionit Ndërparlamentar dhe të Miqësisë Mbretëri e Bashkuar-Shqipëri.

Presidenti Meta vlerësoi veçanërisht partneritetin e fortë dhe tradicional midis dy vendeve.

Ndër të tjera Meta shprehu mirënjohjen për mbështetjen që Mbretëria e Bashkuar ka dhënë për konsolidimin e demokracisë dhe të zbatimit të ligjit në Shqipëri.

Në mënyrë të veçantë Presidenti Meta vlerësoi rolin e deputetëve britanikë për promovimin e Shqipërisë, si dhe theksoi nevojën e nxitjes së mëtejshme të bashkëpunimit dypalësh, veçanërisht të atij ekonomik e tregtar. Presidenti shprehu besimin se të rinjtë që kanë kryer studimet në Mbretërinë e Bashkuar do të integrohen më mirë në të gjitha nivelet e vendimmarrjes, që të shërbejnë si katalizatorë të bashkëpunimit më të thelluar dypalësh.

Duke iu referuar bashkëpunimit për çështjet e sigurisë dhe sfidat e përbashkëta në këtë drejtim, Meta, theksoi rëndësinë e bashkëpunimit më të ngushtë në drejtim të luftës kundër krimit të organizuar dhe trafiqeve të qenieve njerëzore në të ardhmen.

Presidenti shprehu gjithashtu besimin se, edhe në kuadrin e Samitit të ardhshëm të Londrës për Ballkanin Perëndimor, deputetët britanikë do të vijojnë të kontribuojnë për ruajtjen e vëmendjes së Mbretërisë së Bashkuar ndaj Shqipërisë dhe rajonit të Ballkanit Perëndimor.

Deputetët britanikë e siguruan Presidentin Meta se Mbretëria e Bashkuar është shumë e angazhuar për ta forcuar bashkëpunimin me Shqipërinë dhe rajonin e Ballkanit Perëndimor, si në aspektin dypalësh ashtu edhe në kuadër të NATO-s dhe BE-së.