Presidenti i PAOK-ut kërkon falje: Nuk kam kërcënuar askënd!

Pamjet kur presidenti i PAOK-ut, Ivan Savidis, hyn në fushën e lojës me armë në brez bënë xhiron e botës dhe për dy ditë rresht ka qenë temë thuajse të gjitha medieve europiane dhe jo vetëm.

Ngjarja e rëndë solli më pas edhe pezullimin e kampionatit nga Qeveria e Greqisë, ndërsa për Savidis u nxorr një mandate arresti. Së fundi, presidenti ruso-grek i PAOK-ut, ka kërkuar falje publike me një deklaratë të tij:

“Të nderuar zotërinj, dëshiroj të kërkoj falje ndaj të gjithë tifozëve të PAOK-ut, të gjithë tifozëve grekë, komunitetit të futbollit. Më vjen keq për atë që ka ndodhur. Natyrisht, nuk kam të drejtë të dal në fushë në atë mënyrë.

Reagimi im emocional është shkaktuar nga gjendja e përgjithësuar negative, që mbizotëron në futbollin grek kohët e fundit dhe nga të gjitha ngjarjet e papranueshme që ndodhën në fund të ndeshjes PAOK-AEK.

Veprimet e gjyqtarit, ndërprerja e ndeshjes, protestat dhe hyrja në fushë e dhjetëra njerëzve të të dy ekipeve. Të gjitha këto mund të bënin që situata të degradonte dhe qëllimi im i vetëm ishte të mbroja tifozët e PAOK-ut nga provokimet.

Nuk kisha ndërmend të ndërhyja te skuadra kundërshtare apo gjyqtarët. Nuk kam kërcënuar askënd. Unë dhe kolegët e mi jemi peng i institucionit të futbollit, që është krejtësisht i sëmurë.

Po luftoj dhe do të vazhdoj të luftoj kundër sulmeve të vazhdueshme në të gjitha nivelet për një futboll të ndershëm, me arbitrim të ndershëm. Përsëri kërkoj falje! Presidenti i PAOK-ut, Ivan Savidis!