Kosova rrezikon t’i luajë në Shkodër ndeshjet e Ligës së Kombeve

UEFA i ka dërguar Federatës së Futbollit të Kosovës (FFK) një letër të përgjigjshme për punët që janë kryer dhe që duhet të kryhen në stadiumin e qytetit të Prishtinës dhe aty ka shumë kritika.

FFK-ja ia ka përcjellë këtë letër Ministrisë së Kulturës, Rinisë dhe Sportit (MKRS), që po merret me ndërtimin e stadiumit në Prishtinë.

UEFA, pasi javë më parë dërgoi tre inspektorë për të inspektuar stadiumin që po ndërtohet tani e dy vjet, në letër ka ngritur shqetësime serioze nëse stadiumi do të jetë gati për ndeshjen e parë të përfaqësueses së Kosovës në Ligën e Kombeve, që luhet më 10 shtator.

Në letrën e UEFA-s, dërguar të premten, thuhet se ka shumë punë për t’u bërë e disa edhe për t’u ribërë, pasi nuk janë bërë mirë.

UEFA ka kërkuar nga pala kosovare që më së largu deri më 20 prill të marrë informacione të sakta se kur do të përfundojnë punimet, kush do të jetë përgjegjës për mirëmbajtje pas përfundimit.

Këto përgjigje nuk i morën me vete tre zyrtarët e UEFA-s, të cilët qëndruan në Kosovë më 4 dhe 5 prill. Zyrtarët e UEFA-s inspektuan punimet e deritanishme në stadiumin e Prishtinës, por u larguan nga Kosova pa dhënë ndonjë koment.