Nga Argjentina në Moskë me biçikletë, aventura 80 mijë km e tifozit

Një aventurë e denjë për librin “Guinness”. Një udhëtim i gjatë mbi 80 mijë km me biçikletë, 37 shtete të vizituara në 5 vjet, për të mbërritur në Rusi, është realizuar me sukses.

Kjo është historia e Matias, tifozit të kombëtares argjentinase, i cili, i nisur nga San Huan të Argjentinës, ka mbërritur deri në Sheshin e Kuq të Moskës në Rusi.

Ai që e frymëzoi këtë sipërmarrje ishte objektivi për të thyer një rekord “Guinness”, motivimi dhe ndihma e shumë familjeve që takoi gjatë këtij rrugëtimi:

“Pa to, nuk do të isha këtu. Biçikleta ime është plot me kujtime të tyret”. Mes fazave të udhëtimit është edhe udhëtimi në Brazil, për Botërorin e 2014-ës dhe 5 muaj udhëtim nëpër Itali.

Sapo mbërriti në Rusi, argjentinasi shpjegoi: “Pasi humba punën, shtëpinë dhe makinën, zbulova njerëz që me pak para ndanë botën me mua.

Vendosa ta bëj këtë udhëtim nëpër botë dhe tani do të ndjek Argjentinën në Botëror. Biçikleta peshon 90 kg dhe e kam quajtur ‘Liria’”.