MENU
klinika

Mentor Nazarko

Intervista ekskluzive me presidentin Bujar Nishani

11.05.2017 - 16:28

Intervistë/ Editorialisti Mentor Nazarko me presidentin Bujar Nishani.

Mentor Nazarko: Cili ishte bilanci i kësaj vizite historike për ju në muajt e fundit të mandatit?

Bujar Nishani: Dje isha përsëri në Kosovë të takoj autoritetet më të larta të Kosovës, të komunikoj, kontaktoj mjaft prej autoriteteve lokale të qyteteve dhe komunave të ndryshme të Kosovës dhe të lidhet kjo vizitë me dëshminë time se brenda këtyre 5 viteve sa shumë ka përparuar dhe ka arritur në përpjekjet e saj Kosova, por njëkohësisht edhe çështja e rëndësishme që na preokupon neve shqiptarëve, ajo që ka të bëjë me ecurinë e identitetit kombëtar shqiptar edhe prezantimin e tij në hapësira shqiptare, por edhe përtej hapësirës shqiptare edhe atë rajonale dhe evropiane. Sot ishte një moment jashtëzakonisht i veçantë, unë pata një fat që do të donte çdo njeri ta kishte, aq më tepër politikanët, që nga presidenti Thaçi, nga shteti i Kosovës m’u akordua Medalja e artë e lirisë së Kosovës, çka unë nuk di ende të them nëse e meritoj realisht, plotësisht, por ajo që mund të garantoj është fakti që për dimensionin e lirisë unë personalisht nuk do të ndalem asnjëherë për të kontribuar.
Mentor Nazarko. Çfarë keni bërë ju konkretisht për Kosovën që e mbani si momentin më të rëndësishëm gjatë mandatit tuaj 5-vjeçar? Ju individualisht ose ju si institucion, Presidenti.
Bujar Nishani: Unë mendoj që përpjekjet, në radhë të parë, për të përçuar vlerat e Kosovës kanë qenë një angazhim dhe një detyrë për të cilën jam përpjekur. Pse e them këtë? Kosova dhe autoritetet e Kosovës, institucionet e Kosovës, qytetarët e Kosovës kanë një jetë të përditshme goxha dinamike dhe kanë kontribute të jashtëzakonshme edhe shpeshherë​, herë në mënyrë të qëllimshme, herë në mënyrë të paqëllimshme, këto kontribute të Kosovës edhe kjo dinamikë e Kosovës mundohet të lihen në harresë, të fshihet, të mos demonstrohet, të mos prezantohet. Pa dyshim nga ata të cilët nuk dëshirojnë të evidentojnë suksesin e shtetit të Kosovës, por përpiqen që historinë e shtetit të Kosovës ta tregojnë si një histori dështimi, si një histori e cila nuk mund të vazhdojë të funksionojë. Kur në realitet është tërësisht e kundërta, ndaj të gjithë ne që angazhohemi dhe bëjmë përpjekje për ta prezantuar, politika, media, shoqëria civile, miqtë, partnerët e Kosovës i kryejnë jo vetëm një nderim Kosovës, por i bëjnë edhe një nder pikërisht këtij kontributi dhe këtij realiteti rajonal dhe evropian.

Mund të sjell një episod vërtet të rëndësishëm, i cili, ndoshta jo në kontekstin përfundimtar, por thjesht momental, mund të mos shikohet si një histori e plotë suksesi, por unë mendoj që ka pasur një angazhim vërtet të rëndësishëm edhe pati disa suksese të arritura. Siç ishte, në radhë të parë, përpjekja e autoriteteve të Kosovës në procesin e anëtarësimit të Kosovës në UNESCO. Në atë kohë kam ofruar gatishmërinë edhe kam bashkëpunuar ngushtësisht me përpjekjet e presidentes Jahjaga dhe së bashku kemi bërë të mundur që të arrijmë disa reagime pozitive, që ishin momente dilemash të mëdha në këtë proces, pa dyshim që aq sa u arrit, ishte tërësisht e arritur dhe konkluzion i përpjekjeve që bënë autoritet e Kosovës, partnerët dhe miqtë e Kosovës, por unë pata jo vetëm kënaqësinë e veçantë dhe privilegjin, por edhe nderin që dhashë në bashkëpunim me presidenten dhe me stafin e saj, dhamë një kontribut në disa vende që ishin skeptike në momentin e fundit të procesit, dhe është një proces që ka mbetur i hapur, pavarësisht se nuk u konkludua, por janë ndërmarrë disa hapa shumë të rëndësishëm, duke qartësuar mjaft nga skeptikët e atyre ditëve dhe asaj kohe.

Mentor Nazarko: Shqiptarët do të votojnë në qershor, shqiptarët e Kosovës ose të Shqipërisë, në mes të një krize qeveritare, për shkak të mocionit të madh të mosbesimit, dhe shpalljen e ditës së zgjedhjeve, 18 qershori. A ka një leksion të Kosovës për Shqipërinë në mënyrën se si u manaxhua kjo krizë, në kuptimin që të gjitha palët pranuan shtyrjen e zgjedhjeve pa kontestim, ndërkohë që në Shqipëri panorama është krejt e ndryshme.

Bujar Nishani: Pa diskutim, ka një leksion në fakt në disa dimensione, disa çështje. Së pari, dje të gjithë ishim dëshmitarë të një ushtrimi të demokracisë në kuvendin e Kosovës, i cili reflektoi dhe u bazua krejtësisht në një logjikë institucionale, në një logjikë politike edhe në një logjikë të një kulture civile. Ky është njëri prej dimensioneve të leksionit që Kosova shpalosi dje.
Së dyti, ishte pjesa të cilën unë e konstatova ditën e sotme. Ditën e sotme, përveç takimeve me autoritet më të larta të shtetit të Kosovës, unë u takova me përfaqësuesit e të gjitha partive politike të Kosovës, kryesisht ato të opozitës, dhe një dimension tjetër që vjen nga leksioni i Kosovës për Shqipërinë kishte të bënte me faktin se nuk kishte ndonjë dilemë apo dyshim të madh nga partitë politike të opozitës në Kosovë që procesi do të jetë i manipuluar apo do të jetë i pamundësuar që qytetarët e Kosovës të hedhin votën e tyre në mënyrë të lirë për atë subjekt që ata dëshirojnë

Mentor Nazarko: Si e shpjegohet kjo sipas jush, që Shqipëria tashmë shtet prej 105 vjetësh dhe Kosova është një shtet i ri. Si shpjegohet kjo sipas jush?

Bujar Nishani. Kjo është një përgjegjësi drejtpërsëdrejti e klasës politike dhe askush nuk mund t’i ikë kësaj përgjegjësie, nga aktorët politikë, nga subjektet politike, nga trashëgimia politike. Por ne nuk mund të mbetemi peng i këtyre konstatimeve dhe këtij realiteti. Ajo që është më shumë e rëndësishme, sipas meje, është nëse do të nxjerrim përfitime nga këto leksione që vijnë nga Kosova, siç thatë ju, është që të gjithë aktorët dhe operatorët e shoqërisë në Shqipëri të japin një lloj kontributi, të japin ide, të japin propozime edhe të këmbëngulin fort se si ne të fillojmë të dalim nga kjo trashëgimi jopozitive e këtij mosbesimi, dhe e këtyre standardeve të cenuara dhe të shkojmë drejt asaj që unë ndesha sot dhe pashë sot si realitet midis partive të opozitës së Kosovës, të cilët ishin absolutisht në respekt të procedurave dhe imagjinoni për një periudhë shumë të shkurtër kohe ku parashikohen të kryhen votimet brenda 45 ditësh ku partitë politike dhe institucionet që merren me infrastrukturën zgjedhore janë të gatshme për të dhënë garanci edhe për të realizuar standarde të pranueshme nga të gjitha palët për procesin zgjedhor.

Mentor Nazarko: Sot patëm një pozicionim lidhur me zhvillimet në Shqipëri, një pozicionim të Komisionerit Hahn, një letër e hapur për popullin shqiptar, në të cilin ai konfirmon atë që është qëndrimi përfundimtar i bashkësisë ndërkombëtare, i shprehur qoftë nga ambasadori amerikan Lu, qoftë nga përfaqësues të partive popullore, që zgjedhjet duhet të zhvillohen në afatin e duhur, që BE apo OSBE ka dërguar një komision, një grup komisionerësh, një grup kompetentësh. Cili është mendimi juaj për këtë

Bujar Nishani: Jo, nuk kam njohuri. Kam dëgjuar që ka pasur sot një letër, sepse mësa di unë, letra është e ditës së sotme, ndaj nuk do të hyj në detaje, sepse duhet ta njoh në detaje letrën. Por ajo që mund të them ka të bëjë me faktin që, natyrisht të gjithë jemi që të respektohen standardet e demokracisë, të respektohet pjesëmarrja në zgjdhje, sepse demokracia ushtrohet nëpërmjet proceseve. Proceseve që duhet të jenë demokratike, por unë jam i bindur që ashtu siç BE-ja dhe gjithë partnerët e Shqipërisë janë mbështetës të plotë të proceseve, përfshirjes në procese, nuk besoj dhe nuk kam ndonjë dilemë apo pikëpyetje që nuk janë në favor të dhunimit të zgjedhjeve, të dhunimit të së drejtës së qytetarëve për zgjedhjet, të mohimit të së drejtës nga ana e njerëzve të cilët nuk i lejojnë njerëzit dhe qytetarët të shkojnë të votojnë apo që i detyrojnë të votojnë për një forcë apo një tjetër politike sipas qëndrimit që mund të mbajnë grupet kriminale apo grupe problematike në shoqërinë shqiptare.
Unë mendoj që të dyja qëndrimet që vijnë nga vlerat evropiane, si përfshirja dhe pjesëmarrja në proceset demokratike, ashtu dhe garantimi i të drejtës dhe lirisë për të votuar.

Mentor Nazarko: Ka hapësirë që të respektohet dekreti juaj, pra që zgjedhjet të zhvillohen në 18 qershor në Shqipëri apo jo?

Bujar Nishani: Unë mendoj që sot proceduralisht janë të pamundura dhe ne nuk duhet të fshihemi pas gishtit. Unë i kam dekretuar zgjedhjet. Patëm një eksperiencë para pak ditësh kur edhe zgjedhjet e dekretuara të parakohshme për bashkinë e Kavajës u ra dakord për t’u shtyrë, në mënyrë që të krijohen më shumë mundësira dhe hapësira për pjesëmarrje në zgjedhje dhe në fakt kjo tolerancë, për hir të së vërtetës, erdhi nga mazhoranca, erdhi nga qeveria. Unë e vlerësova këtë qëndrim si një vlerësim të pjekur dhe të matur. Ndërsa në rastin e zgjedhjeve të 18 qershorit, praktikisht është e pamundur që opozita shqiptare, partitë politike të opozitës shqiptare të marrin pjesë.

Mentor Nazarko: Shikoni ju një zgjidhje kushtetuese që zgjedhjet të shtyhen apo do të gjenden artifica si ai i Kavajës me tërheqje kandidatësh apo ndonjë zgjidhje me kolegjin zgjedhor?
Unë nuk do të desha të jepja receta, veçanërisht për çështje që janë kaq të ndjeshme politikisht. Por nëse do të ketë një negocim, patjetër që ky negocim duhet të fillojë te mundësia e shtyrjes së zgjedhjeve, dhe se sa do të jetë kjo hapësirë e shtyrjes së zgjedhjeve, kjo pastaj do t’i takojë, nëse palët bien dakord formalisht dhe parimisht për të shtyrë zgjedhjet, për të bërë të mundur futjen e opozitës në zgjedhje.

Mentor Nazarko: Ju jeni të gatshëm që vazhdoni të luani rolin ndërmjetësues apo mendoni që nuk ka më hapësirë që palët të gjejnë një zgjidhje?

Bujar Nishani: Hapësira e diskutimit dhe e negocimit të palëve nuk mbyllet dhe nuk do të mbyllet, jo vetëm deri në ditën që unë do të jem në zyrën e presidentit të Republikës, por edhe më pas, kur në zyrë të vijë presidenti i ri i republikës. Negociatat midis palëve do të jenë në çdo rast jo vetëm për këtë krizë aktuale që ne kemi, por edhe në vijimësi, sepse në fund të fundit procesi i dialogut dhe i komunikimit nuk mund të shkëputet nga demokracia dhe funksionimi i saj. Unë ende vazhdoj të ruaj kontakte me palët dhe do të vazhdoj kështu deri në ditën e fundit të detyrës, ashtu siç besoj që edhe presidenti i ri do të vazhdojë përpjekjet për negocim.

Mentor Nazarko: Si shkuan negociatat, meqë aty ishin dy raunde me ndërmjetësimin tuaj? Si shkuan ato sipas jush?

Bujar Nishani: Përderisa nuk pati një zgjidhje, nuk do të thotë që nuk ishin negociata të suksesshme. Por duke mos përcjellë në media detajet e takimit meqë ishte konfidencial, palët dhanë aq sa kishin vendosur të jepnin për opinionin publik. Por mund të them dy gjëra: nga njëra anë, ka ndjeshmëri të përgjegjësisë tek aktorët, pra e kuptojnë përgjegjësinë e pozicionit që ata kanë, dhe në anën tjetër, është dimensioni i tyre strikt në pozicionet e tyre politike dhe në kërkesat e tyre politike. Pra janë dy momente që prezantohen në mënyrë të qartë, por që nuk konvergojnë me njëri-tjetrin.

Mentor Nazarko: Ju keni bashkëpunuar me faktorin ndërkombëtar për të ofruar një zgjidhje.

Bujar Nishani: Ka qenë një bashkëpunim me faktorin ndërkombëtar për të lehtësuar komunikimin.

Mentor Nazarko: Kishte një platformë si ajo e McAlister apo ishit thjesht lehtësues i dialogut?

Bujar Nishani: Së pari, ka qenë për të lehtësuar komunikimin, pasi edhe para se të zhvillohej komunikimi në presidencë, megjithëse palët kanë komunikuar, por në pozicione shumë të ngurta. Për herë të parë ato u ulën përballë njëra-tjetrës, dhe unë nuk preferova që në tavolinë të vihej një platformë dhe agjendë konkrete. Një nga çështjet që i ka mbajtur palët ka qenë edhe debati i pasjes së një agjende me pika të caktuara, ku njëra palë i përfshinte disa çështje dhe pala tjetër i përjashtonte ato. Mendova se do të ishin palët ato që do të përcaktonin se ku mund të fillohej me temat që përafrojnë negocimin. Pati diskutime për të gjitha çështjet që secila prej palëve mbronte, tek zgjedhjet kryesisht, te afatet e zgjedhjeve, te masat që duhet të marrë qeveria.

Mentor Nazarko: Mundësia e një qeverie teknike ka rënë, kështu u diskutua…

Bujar Nishani: Pala e opozitës vazhdonte qëndronte në pozitën e saj për qeveri teknike dhe përmes saj të garantoheshin kërkesat e saj. Qeveria, pa dyshim, që e përjashtonte një gjë të tillë me argumentet e saj. Mendoj që hapësirat për dialog dhe për të pasur një marrëvesje nuk mund të konsiderohen kurrë të ezauruara. Këtë mund ta konfirmoj me një shembull nga historia: asnjë krizë, sado e rëndë që të ketë qenë ajo, nuk ka zgjatur pafund. Çdo krizë e ka një fund. Çdo krizë e ka një zgjidhje. E rëndësishme është sa kohë merr zgjidhja e krizës dhe sa kosto jep zgjidhja e saj. Duke pasur parasysh këtë, unë u mundova t’u bëj me dije të dy aktorëve kryesorë që pikërisht në këtë histori të zhvillimit të sistemit tonë politik, duhet të bëjmë një kompromis. Kur themi kompromis, unë kam parasysh që të dyja palët duhet të lëvizin nga pozicionet e tyre strikte.

Mentor Nazarko: A ishit i pranishëm gjatë gjithë bisedimeve?

Bujar Nishani: Unë kisha përgjegjësinë e ftesës dhe garancisë së takimit. Mund të them që është pirë shumë kafe.

Mentor Nazarko: Por këta dy bashkëbiseduesit nuk ishin aq agresivë sa janë në foltoret e tyre respektive…

kolana e librave

Bujar Nishani: Jo, nuk mund të them që ishin agresivë, por goxha striktë në pikat e tyre të negocimit. Dukej që ishin negociatorë të fortë…

Mentor Nazarko: Unë individualisht jam për një qeveri që përfaqëson një konsensus të gjerë, njësoj si në Kosovë koalicioni PDK-LDK. Ju personalisht jeni për një qeveri të tillë me bazë të gjërë për t’i arritur objektivat e integrimit?

Bujar Nishani: Unë këtë do ta lija tërësisht në gjykimin dhe vlerësimin e palëve politike. Këto besoj se mund ta themi pas 24 korrikut. Pas zgjedhjeve, në të cilat do të merrnin pjesë të gjithë, do të mund t’i shihnim aleancat…

Mentor Nazarko: Cila do të ishte një formulë e pajtimit mes dy kërkesave maksimaliste të opozitës, mes një qeverie teknike dhe shtyerjes së zgjedhjeve?

Bujar Nishani: Unë e thashë edhe më parë që kur të arrihet kompromisi, kjo nuk nënkupton që vetëm njëra palë duhet të lëvizë nga pozicioni i saj strikt. Të dyja palët duhet të lëvizin nga pozicionet e tyre. Përfarimi bëhet me mundësinë e pjesëmarrjes së të gjitha palëve në zgjedhje. Së dyti, palët duhet të jenë të bindura se faktorët që riskojnë zgjedhjet duhet të jenë të demotivuar.

Mentor Nazarko: Ka një mistifikim se paratë e pista nga trafiku i drogës do të ndryshojnë vullnetin e votuesve. Kjo është një pjesë, si mund të zgjidhet

Bujar Nishani: Kjo që thatë ju ka të bëjë me një kulturë dhe emancipim shoqëror të një standardi mbi mesatar. Unë e kuptoj fare mirë që procesi i blerjes së votave nuk mund të kurohet brenda një nate. Janë mundësitë që të nisim një proces legjislativ për ta redaktuar këtë. Ajo çka unë i jap të drejtë opozitës ka të bëjë me agresivitetin që drejtohet nga individë që janë të njohur publikisht si të dhunshëm dhe intimidojnë grupime jo të vogla njerëzish, për t’i penguar ata që të dalin në zgjedhje. Ka një numër vërtet shqetësues me rekorde kriminale që janë shfaqur edhe në zgjedhjet lokale.

Për mua çështje më emergjente janë këta njerëz të mos kenë mundësi të intimidojnë komisionerë e detyrojnë familje të pambrojtura të dalin në votime. Kjo dukuri ka ndikim jo të pakët në proceset zgjedhore.
Unë nuk po marr përsipër të pastroj njërën palë dhe të bëj pis palën tjetër, por përderisa këto janë procese që i takojnë instrumentave të shtetit dhe janë instrumenta që i zotëron mekanizmi i ekzekutivit, duhet që t’ua japë garancinë aktorëve të tjerë, që minimumi të ketë një ambient ku përpjekje të tilla të jenë të dekurajuara.

Mentor Nazarko: Vetëm dy pyetje, meqënëse koha është e ngushtë, që lidhen me mandatin tuaj, me raportin mes palëve. Jeni të etiketuar nga shumica si …. kemi bashkëjetuar me dy kryeministra, mund të të bëj një pyetje që tingëllon provokative, por unë e kam…

Bujar Nishani: Si të dëshironi

Mentor Nazarko: …por unë nuk kam fare turp…

Bujar Nishani: Edhe unë nuk kam fare komplekse

Mentor Nazarko: Pra ju do t’i bënit, ju keni patur momente përplasje me këtë shumicë, me këtë që është në pushtet, do t’i bënit këto sikur të ishte Sali Berisha kryeministër?

Bujar Nishani: Do të ishte krejt e pandershme nëse unë do të të jepja një përgjigje tani po ose jo, sepse njeriu duhet të provohet.

Mentor Nazarko: Qartë.

Bujar Nishani: Dhe unë do t’i përgjigjem më së shumti pyetjes suaj për atë që unë jam provuar, është e vërtetë që ka pasur akuza, kanë qenë akuza tërësisht politike, por unë gjithmonë i kam sfiduar ata që kanë bërë akuza, përtej akuzës politike duhet të paraqesin një jo dy, një fakt, një rast kur qëndrimi i presidentit është identifikuar me afilacionin partiak, partizan të palës që e vetmja akuzë që është artikuluar dhe për shkak të cilës ka pasur gjithmonë, le të themi, debate rreth sjelljes institucionale të presidentit të republikës, lidhet vetëm me rikthimet e ligjeve, e disa ligjeve në parlament për t’u rishikuar.

Mund t’ju them një rast: Një president i një vendi, shumë i konsoliduar nga pikëpamja e demokracisë evropiane, vizitonte Shqipërinë, edhe e pritëm së bashku në atë kohë me kryeministrin edhe me kryetarin e parlamentit, dhe në bisedë e sipër, kryeministri e pyeti mikun se sa ligje ka kthyer, dhe tha kam kthyer vetëm 40% të ligjeve. Prandaj them që ka qenë tërësisht një retorikë politike, po të marrësh në konsideratë faktin që e gjithë akuza është artikuluar për shkak të këtij qëndrimi të presidentit, që është një parashikim në fund të fundit kushtetues, i tagrit të presidentit të republikës, dhe që nuk e dëmton le të themi, nuk e pengon, nuk e bllokon veprimtarinë ligjvënëse, sepse nuk është një veto, kthimi i ligjit në paralament.

Mentor Nazarko: A ka patur një kundërvënie rreth stafit të shqiptarëve që luajnë me qëndrime publike kundër qeverisë? Edhe ky në njëfarë mënyre është një lloj kundërshtimi.

Bujar Nishani: Nuk mund të them që ka qenë një fenomen, ka pasur raste të izoluara, por janë shprehur dhe pa dyshim që ka pasur edhe qëndrime institucionale që janë mbajtur ndaj tyre, por unë besoj që nuk ka pasur, nuk ka qenë një fenomen, kanë qenë raste më së shumti që kanë qenë raporte individuale dhe emocionale, por që nuk ka qenë absolutisht një fenomen i caktuar, ose mund të kenë qenë tërësisht individuale, pa lidhje me qasjen institucionale.

Mentor Nazarko: Një vërejtjte e keni për opozitën, ose vërejtjen më të fortë që keni patur ndonjëherë për opozitën dhe që mund të vlejë edhe sot.
Bujar Nishani: Vërejtje mund të bësh sa të duash, vlerësime mund të bësh sa të duash, por unë vërejtjet dhe vlerësimet për maxhorancën dhe për opzitën dua që t’ia lë qytetarëve shqiptarë.

Mentor Nazarko: Një pyetje e fundit, ju si president keni informacione që nuk i kanë qytetarët, kupton, flitet për rrezik destabilizimi në rol rus, Ballkan, Shqipëri, Maqedoni, etj., etj.
Çfarë konsideratash ke në lidhje me ndikimin rus në skenarët e destabilizimit që shqetësojnë bashkimin evropian, që shqetësojnë Shtetet e Bashkuara të Amerikës …

Bujar Nishani: Nuk do t’i referohem nominalisht asnjë vendi, sepse ne kemi marrëdhënie diplomatike dhe respektojmë kodin diplomatik dhe nuk do t’i referohem asnjë shteti tjetër për sa kohë janë institucione të tjera të cilat nëse kanë të identifikuara çështje konkrete që vijnë nga vende konkrete, ato i trajtojnë në mënyrë ligjore dhe kushtetuese, por unë mund të them vetëm këtë, si një e vërtetë e madhe që Shqipëria dhe shqiptarët nuk kanë vetëm miq, kanë edhe jo thjesht konkurrentë, kanë dhe jodashamirës të cilët vazhdojnë përpjekjet e tyre për ta penguar ecjen përpara të Shqipërisë dhe shqiptarëve.

Mund t’u them që përdoret për fatin e keq nga instrumenta të këtyre vendeve jodashamirëse, dëmtimi i imazhit të Shqipërisë duke tentuar të nxitin dhe të keqpërdorin përmes rekrutimit të individëve të cilët kanë realisht joqëndrueshmëri mentale, sociale apo edhe background kriminal për t’u përfshirë, siç ishte rasti i luftëtarëve të huaj që shkonin e luftonin pranë grupeve terroriste në Siri, fenomen i cili fatmirësisht është ndaluar por u përdorën dhe ata janë keqpërdorur pikërisht nga instrumentet e këtyre vendeve jodashamirëse ndaj Shqipërisë dhe shqiptarëve. Ashtu siç ka tentativa dhe investime nga instrumentet e këtyre vendeve jodashamirëse të Shqipërisë për të përdorur njerëzit e botës së krimit për t’i infiltruar në institucionet e shtetit shqiptar, për t’i infiltruar në institucionet vendimmarrëse, përfshi këtu politikën apo agjenci të tjera. Ky është një realitet i cili ka dinamikë. Por nga ana tjetër unë mund të them që tashmë Shqipëria ka një maturim dhe një pjekuri të institucioneve ligjzbatuese, të cilat mund t’i hetojnë dhe është në përgjegjësinë e tyre për t’i parandaluar, por në tërësi edhe të aktorëve të tjerë të shoqërisë jo vetëm i institucioneve ligjzbatuese.

Mentor Nazarko: A ka rrezik destabilizimi protesta e 13 majit?

Bujar Nishani: Nuk besoj. Deklaratat e opozitës janë mjaft të qarta, janë për një lëvizje paqësore, një lëvizje qytetare, një lëvizje civile, sepse përderisa ata janë të fokusuar te një e drejtë fondamntale, siç është e drejta e votës, nuk mendoj që ajo justifikohet përmes aplikimit të mënyrave dhe formave që e cenojnë dimensionin e së drejtës.