Pas një viti “agjërim”, për shkak se Tirana ishte në Kategorinë e Parë, rikthehet derbi i madh i kryeqytetit. Tifozët bardheblu dhe ata të kuq do të kenë mundësinë të shpalosin “arsenalin” e tyre koreografik, por jo vetëm, në përplasjen e së premtes, në “Selman Stermasi”.
Në orën 19:45 të kësaj dite do të startojë ndeshja Tirana-Partizani, e vlefshme për javën e 6-të të Superiores, e cila pritet të jetë një spektakël i vërtetë futbollistik, mbushur me antagonizëm maksimal, në fushë dhe tribuna.
Klubi organizator ka njoftuar që të hënën për biletat dhe çmimin e tyre, duke dashur t’u japë kohë tifozëve për të siguruar një vend në shkallët e “Selman Stermasit”. Ja njoftimi për këtë gjë: “Të martën dalin në shitje biletat e ndeshjes Tirana-Partizani. Sporteli pranë biletarisë në stadiumin “Selman Stermasi” hapet prej orës 09:00 deri më 19:00.
Për të shmangur radhët në ditën e ndeshjes ju kërkojmë të pajiseni me biletë përgjatë ditëve në vijim.
Çmimet e biletave bardheblu:
Tribuna A1/A2 – 2 000 lekë (të reja)
Tribuna C1/C2 – 400 lekë
Tribuna D1/D2/E/F/G1/G2 – 400 lekë
Çmimet e biletave për Partizanin
Tribuna B1/B2 – 2 000 lekë (të reja)
Tribuna H1/H2 – 400 lekë
