Thirrjes “Eja në Gjirokastër” që Bashkia e qytetit, Drejtoria e Trashëgimisë dhe Agjencia Kulturore bënë në 3 muaj më parë në çelje të sezonit i janë përgjigjur turistë të shumtë brenda dhe jasht vendit. Paçka se Gjirokastra nuk ofron atraksionet tipike verore bregdetare, qyteti i grutë mbart shumë histori në çdo kalldrëm e sokak saqë vështirë të shterohet nga vizitorët brenda një dite.
Bashkëpunimi midis Agjencisë së Kulturës dhe Bashkisë ka sjellë organizimin e një seri aktivitetesh që kanë prezantuar tek vizitorët traditën arkitektonike, kostumet tradicionale, kulinarinë dhe muzikën, gjithçka në funksion të promovimit të vlerave qytetase. Po ashtu në skenën e teatrit Zihni Sako, përgjatë këtyre 4 muajve, trupa artistësh profesionistë nga rrethet dhe kryeqyteti kanë sjellë shfaqje teatrale të duartrokitura nga publiku, i pamësuar gjatë vitit me një intesitet të tillë artistik.
Kudret Alikaj, Drejtor i Agjencisë Kulturore tregon:
“Kemi bërë më të mirën e mundshme por besoj se ia kemi dalë të gjallërojmë jetën artistike në muajt e sezonit. Falë kolegëve të trupës sonë teatror por dhe kolegëve të qyteteve të tjera kemi ngjitur në skenë plot 41 shfaqje”
Për ata që dashurojnë artin dhe kulturën e këtij qyteti cdo interpretim skenik e lidhin me historinë e këtij qyteti të mishëruar në çdo muze, kala dhe site arkeologjike që shtrihen brenda perimetrit të Gjirokastrës. Një ndër to është dhe Odeoni ose siç njihet ndryshe Bashteja e Teqesë ku gjatë këtij sezoni janë zhvilluar një seri eventesh kulturore duke nisur që nga monodrama “Apologjia e Sokratit” e deri tek Kinemaja e Hapur, Festa Tradicionale e Gatimit etj. Pa lënë pas dhe tragjedinë “Pirros” me regji të Ilir Llurit, një himn për themeluesin e qytetit antik të Antigonesë, që siç historia tregon ishte fryt i dashurisë së tij së mbretit për bashkëshorten e tij Antogonen.
“Gjirokastra nuk mund të ngelet qytet thjesht i vizitueshëm përciptazi. Ne po punojmë që të ofrojmë turizëm alternativ gjithëvjetor, jo vetëm nëpërmjet asete që kemi, por edhe harmonizimit me aktivitetet kulturore të cilat i japin më tepër gjallëri qytetit” tregon kryebashkiakja Zamira Rami
Gjirokastra këtë vit ishte dhe skenë promovimi e një seri veprash artistike, sikurse vëllimi poetik i aktorit Timo Flloko, i zhvilluar në Shtëpinë e gjeniut të letrave shqipe, kandidat për çmimin Nobel, Ismail Kadare. Promovimi i arteve figurative pati si protagonist edhe artistët e vegjël të qendrës kulturore Fato Berberi, të cilët përcollën me penelatat e tyre sesi do të donin të ishte qyteti i tyre i lindjes. Gjirokastra gumëzhiu këtë verë nga aktivitetet, duke u zgjuar nga letargjia e një stine të gjatë në vaktësi, por sfida mbetet që këtë ritëm qyteti ta ruaj dhe përgjatë vitit, nëse do të arrijë qëllimin e turizmit gjithëvjetor.
Përgatiti: E.B
VAZHDO TË LEXOSH MË TEPËR PËR TEMËN
