Kryetari i partisë Nisma Socialdemokrate dhe njëkohësisht zëvendëskryeministër në Qeverinë e Kosovës, Fatmir Limaj ka thënë se duhet një unitet i klasës politike pasi temat ndërkombëtare nuk negociohen çdo ditë.
Duke folur për mospëlqimin që Serbia ka ndaj tij si udhëheqës i delegacionit të Kosovës, Limaj ka thënë se ka mbaruar koha kur Serbia ka zgjedhur njerëzit në Kosovë.
“Koha kur Serbia ka tentuar të gjejë përfaqësues shqiptarë që u përshtatet atyre ka përfunduar në vitin 1999. Kjo tregon më së miri mentalitetin e tyre. Nuk besoj se ka shqiptarë që dëshiron të bisedoj më Daçiqin ose Vuçiçin por ata janë të zgjedhur të popullit të tyre”, u shpreh Fatmir Limaj.
Zëvendëskryeministri ka thënë se aktualisht nuk ka ndonjë propozim nga Serbia se ajo do ta njohë me ndonjë kusht pavarësinë e Kosovës.
“Le të thotë Serbia se e don gjysmën e Kosovës në këmbim të njohjes së Kosovës, dhe ne do ta japim përgjigjen tonë”, ka thënë Limaj.
Zëvëndëskryeministri Limaj ka thënë se përderisa zyrtarisht nuk ka filluar dialogu, asgjë nuk mund të paragjykohet.
“Pa një propozim zyrtar, nuk dimë për çfarë po flasim. Ne kemi kërkesat tona, siç janë: njohja, anëtarësimi në OKB, por nga Serbia nuk kemi ndonjë ofertë zyrtare. Nëse Kosovës i bashkangjiten territore nuk prish punë, por nëse ndodh e kundërta, pra duhet dhënë territore, atë s’mund ta bëjë gjithkush”.
Kreu i Nisma Socialdemokrate ka thënë se momentalisht partitë politike kanë mosmarrëveshje të brendshme në Kosovë dhe shtoi që është koha që vendimet politike të jenë unifikuese.
“Në Kosovë kemi mosbesim. Kemi personalitete të diskutueshme. Kemi mosbesime për arsye të ndryshme nga përvoja të ndryshme. Unë kam probleme me Presidentin, është normale kjo pasi është një temë nacionale. Por, në Bruksel duhet të bëhemi bashkë dhe të marrim përgjegjësi”, deklaroi Limaj.
VAZHDO TË LEXOSH MË TEPËR PËR TEMËN
“Marrëveshja Kosovë-Serbi arrihet në nëntor”
