Kjo foto historike është marrë nga një album i “New York Times” shkrepur në vitin 1960 nga një studio fotografike në Karolinën e Jugut. Aty shfaqet Linda, vajza që fitoi me një vendim gjykate shkollimin në shkollën publike të të bardhëve.
Në një klasë, ku kishte vetëm fëmijë të bardhë vajza e vogël guxoi të bëhej pjesë e një ambienti ku prindërit e shokëve të saj të rinj, protestonin që Linda të mos të shkollohej aty.
Ishte koha e përplasjeve të ashpra mes afroamerikanëve që kërkonin të drejta të barabarta njëlloj si të bardhët, në votë, në shkollë, në ambiente publike dhe kudo tjetër.
Nëna e Lindës, një punëtore e fabrikës së kapeleve dhe babai, një pastor invalid shëndetlig, luftuan me paragjykimet e komunitetit të asaj kohe për të çuar të bijën në shkollën publike të zonës.
Kurajoja e një nëne që përballoi presionet e shumta, që të shkollohej e bija, arriti bashkë me një avokate të panjohur të fitonte një gjyq që bëri bujë në gjithë mediat amerikane.
Fitorja ishte një ndër nismat e shumtat që më vonë do të çonin afro-amerikanët në marshimin historik.
Linda shkoi në shkollë dhe e pa u stepur u ul në bankën e parë mes 26 fëmijëve të bardhë. Të gjithë fëmijët e përqafuan shoqen e tyre duke i dhënë secili një fletore nga të vetat.
Asnjë nga fëmijët nuk u frikësua nga reagimi i prindërve, sepse ndoshta ata të gjithë e kishin pranuar si të barabartë mes tyre.
Sot ishte dita e parë e shkollës dhe shumë nxënës u ulën për të kryer ritualin e përvitshëm të nxënies së dijes. Sfida jonë në raport me edukimin është e njëjtë me të Lindës, po aq e nevojshme, është ndoshta dhe më e vështirë.
Lufta jonë sot është me anti-vlerat, me krizën e identitetit, me atë që sforcohet për të gjetur apo pranuar vetveten.
Lufta jonë sot është me analfabetizmin funksional! Lufta jonë është për edukimin!
Ndaj nga sot i uroj çdo nxënësi suksese. Asnjëherë mos u ndje i pafuqishëm apo i përjashtuar. Lufto dhe ti si Linda për t’u shkolluar.
