Milazim Krasniqi/
Edhe komunizmi si ideologji e cila proklamoi barazinë e njerëzve dhe zhdukjen e dallimeve klasore, racore e kombëtare dhe madje edhe zhdukjen e shtetit, ishte produkt i dhunës së egër dhe i projektit shfarosës ndaj kundërshtarëve ideologjikë.
Me miliona njerëz ranë viktima të kësaj ideologjie terroriste dhe gjenocidale. “Në këtë mënyrë gjatë shekullit XX në kasaphanat politikisht të motivuara janë zhdukur në mënyrë të qëllimshme jo më pak se 167 000 000 – madje ka shumë të ngjarë ky numër të jetë mbi 175 000 000. Ky është barasvlerësi i përafërt i numrit të përgjithshëm të popullsive të Francës, Italisë dhe Britanisë së Madhe, ose dy të tretat e popullsisë aktuale të Shteteve të Bashkuara”.
Sipas specifikimeve që i ka prezantuar ky autor në librin e lartcituar, vetëm Hitleri ka shkaktuar vdekjen e 17 000 000 njerëzve, ndërsa Stalini ia kaluar, duke shkaktuar vdekjen e 20 000 000 ose 25 000 000 njerëzve. Ndërkaq, në anën tjetër, Revolucioni Komunist Kinez, i huazuar nga europianët, po sipas burimit të njëjtë, ka shkaktuar vdekjen e rreth 29 000 000 njerëzve në Kinë.
Zbingiev Brzhezhinski konkludon se “shifrat e mësipërme të vdekjeve totale nuk mund ta përmbajnë dhe, duke pasur parasysh përmasën e tyre, mendja njerëzore as nuk mund ta marrë me mend, dëmin e shkaktuar dhe çoroditjen morale që u përftuan në kataklizmat binjake të shekullit XX: në luftërat e tij masive dhe në revolucionet totalitare. Gjatë dy luftërave botërore, Evropa, djepi i qytetërimit perëndimor, ka qenë subjekt i më shumë se dhjetë vjet shkatërrimesh të vazhduara dhe vrasjesh masive”.
Kështu shtylla judeo-kristiane e qytetërimit perëndimor është përgjakur që nga gjeneza e saj dhe ka prodhuar tragjedi të panumërta në vetë botën kristiane.
Ky ka qenë rezultati logjik i devijimeve drastike që janë bërë ndaj figurës dhe misionit të Isait a.s., birit të Merjemes, me çka hebrenjtë dhe të krishterët kanë ardhur në konflikt, e pastaj edhe vetë të krishterët ndërmjet vete.
Mburrja me një trashëgimi të tillë të përgjakshme flet në të mirë të faktit se akoma nuk është kuptuar gabimi fatal që është bërë ndaj të dërguarit të Zotit, Isait a.s., të birit të Merjemes, dhe misionit të tij në mesin e njerëzve.
Mungesa e vullnetit për të bërë korrigjimin e gabimit, e mbuluar nga mburrja arrogante për gjoja epërsinë e qytetërimit perëndimor dhe nga përpjekjet që të imponohet me dhunë një sistem vlerash i ndërtuar mbi themelet e devijimit të rëndë, është tipari kryesor i frymës së ashtuquajturit Rend i Ri Botëror me globalizmin si ideologji të re neoimperiale.
(Fragment nga libri “Dhuna dhe qytetërimi perëndimor: Islami si fillim i historisë”, Logos A, 2006)
