Ditën e sotme u publikua një video ku shihej një shofer, i cili sipas të dhënave, transportonte nxënës shkollë, teksa dhunonte njërin nga fëmijët në ambjentet e një furgoni.
Pas hetimit të ngjarjes është bërë i mundur arrestimi i shoferit në fjalë.
Sipas burimeve të Policisë, bëhet fjalë për shtetasin Edmond Sela, 35 vjeç, banues në fshatin Burim.
Mësohet se Sela kishte dhunuar nxënësit me motivin pasi pretendonte se i kishin djegur me cigare sediljet e automjetit.
Nga verifikimet e kryera ka rezultuar se 35-vjeçari, i cili drejtonte automjetin e tij autobus, me targa AA 633 BO kryente transportin e nxënësve në rrugë dytësore nga fshati Burim për në shkollën e Majtarës, në njësinë administrative Maqellarë.
Ngjarja në fjalë mësohet të ketë ndodhur më datë 4, ndërkohë lajmi është bërë i ditur vetëm sot.
Njoftimi i plotë i Policisë:
“Në përfundim të veprimeve të para hetimore shtetasi Edmond Sela, u arrestua për veprën penale “Keqtrajtim i të miturit”, parashikuar nga neni 124/b i Kodit Penal.
Gjithashtu rezultoi se kishte mangësi në dokumentacion, e për mangësitë e konstatuara do të procedohet administrativisht nga Policia Rrugore.
Drejtoria Vendore e Policisë Dibër është e angazhuar maksimalisht për sigurinë e qytetarëve, veçanërisht për sigurinë e fëmijëve dhe fton qytetarët, nxënësit, prindërit e mësuesit të denoncojnë çdo shkelje apo cënim të dinjitetit, shëndetit e jetës së tyre, duke garantuar një reagim të shpejtë profesional dhe të paanshëm.”
VAZHDO TË LEXOSH MË TEPËR PËR TEMËN
