Inflacioni ra për të tretin muaj radhazi gjatë shtatorit. Instituti i Statstikave bën të ditur se indeksi i çmimeve të konsumit shënoi rritje vjetore me 2.1%, 0.1% më pak krahasuar me gushtin. Rënia u ndikua sidomos nga grupi i ushqimeve dhe i veshjeve, megjithatë, ngelet në nivele më të larta krahasuar me vitin e kaluar, kur ishte në nivelin 1.6%. Shtrenjtimi i ushqimeve gjatë muajit shtator ishte më i kufizuar, me 2.6%, nga 2.8% një muaj më parë.
Gjatë shtatorit u regjistrua një zbutje e rritjes së çmimeve të perimeve. Inflacioni i këtij nëngrupi ngelet dyshifror, megjithatë, në shtator ra në 14.8% nga 18.6% që kishte qenë për gushtin.
Rënie të ndjeshme inflacioni pësoi edhe për grupin “veshje dhe këpucë” në 0.6%, nga 2.4% që kishte qenë gjatë muajit paraardhës.
Megjithëse në muajt e fundit luhatjet e inflacionit ka qenë minimale. Sipas Bankës së Shqipërisë, rikthimi i tij drejt nivelit të synuar prej 3% do të kërkojë ende kohë dhe nuk pritet të ndodhë para vitit 2020. Për momentin, pozitiv në optikën e përmbushjes së këtij objektivi është fakti se inflacioni po qëndron sipër 2%, që është edhe kufiri i poshtëm i intervalit.
Banka e Shqipërisë vlerëson se leku i fortë në kursin e këmbimit valutor është një faktor që do të vazhdojë të ketë një farë ndikimi te inflacioni edhe gjatë muajve në vazhdim.
VAZHDO TË LEXOSH MË TEPËR PËR TEMËN
Çmimet u rritën 2.2% për gushtin
