MENU
klinika

Sot në Ligën e Kombeve

Izrael-Shqipëri, kuqezinjtë s’duhet të humbin…

14.10.2018 - 12:21

Kombëtarja shqiptare do të luajë sot (20:45) ndeshjen e tretë për Ligën e Kombëve. Shqipëria duhet medoemos që të marrë rezultat pozitiv ndaj Izraelit në transfertë, përndryshe do të jetë pjesë e vazos së katërt për shortin e “Euro 2020”, që do të hidhet në fillimin e dhjetorit.

UEFA ka vendosur prej kohësh që të marrë për bazë renditjen në Ligën e Kombeve për të ndarë vazon dhe Shqipëria aktualisht e sheh veten në vazon e katërt. Kuqezinjtë, në bazë të rezultateve të deritanishme në turne, mbajnë vendin e 34-t në Ligën e Kombeve.

Për të qenë në vazon e tretë, të cilën e fituan me mund gjatë drejtimit të De Biasit, duhet që ekipi të jetë mes vendeve 25-30, pra 6 skuadrave më të mira të Ligës C.

kombetarja stervitje

Kjo arrihet vetëm duke fituar grupin, apo duke qenë mes 2 të dytave më të mira në të katër grupet e ligës C, me pikë të siguruara dhe me golavarazh. Bilanci aktual nuk është premtues, pasi edhe në “minirenditjen” e vendeve të treta, jemi të dytët pas krahëve të Hungarisë, që ka të njëjtën kuotë pikësh dhe golavarazhin -1, si ne, por ka shënuar 2 gola, kundrejt 1 të kuqezinjve.

Golavarazhi pritet të jetë shumë vendimtar, ndaj për të evituar vazon e katërt, nevojitet jo vetëm që të merret rezultat ndaj Izraelit, por edhe të shënohen gola.

Në rast humbjeje, sido që të ndahet sfida me Skocinë, vazoja e katërt duket e prenotuar nga kuqezinjtë, të cilët kësisoj do të kishin një short shumë më të vështirë përpara në rrugëtimin drejt Europianit.

kombetarja panucci
kombetarja panucci

Izraelitët do të kërkojnë të hakmerren për humbjen 1-0 të pësuar në ndeshjen e parë të Nations League të luajtur në Shqipëri dhe për atë 3-0 të pësuar në shtëpi në qershorin e 2017-ës. Problemi kryesor i Izraelit ka qenë shënimi i golave, me ndeshjen kundër Skocisë që ka qenë e para që nga marsi i 2017-ës ku ata kanë shënuar dy herë në të njëjtën ndeshje.

Golat janë një problem edhe për kuqezinjtë. Në fakt, Shqipëria ka shënuar vetëm dy gola në gjashtë ndeshjet e fundit. Gjithashtu, ata kanë shënuar 3 ose më shumë gola në vetëm 3 nga 25 ndeshjet e fundit, me dy nga këto ndeshje që kanë ardhur në transfertë, duke përfshirë këtu edhe triumfin 3-0 të marrë në fushën e Izraelit.

Parë në shifra financiare, Izraeli kuotohet në vlerën e 48 mln euro, të paktën sipas faqes së specializuar për transferime, “Transfermarkt”. Ndërkohë Shqipëria ka një vlerë më të lartë, me rreth 68 mln euro, po sipas kësaj faqje.

kombetarja andi lila

Edhe pse u provuan disa lojtarë të rinj pak ditë më parë në ndeshjen miqësore mes Shqipërisë dhe Jordanisë, në formacionin e titullarëve pritet të rikthen shumë nga lojtarët që nuk luajtën në atë ndeshje.

Hysaj, Basha dhe Memushaj pritet të jenë që nga minuta e parë. Porta pritet t`i besohet Thomas Strakoshës, që u la pushim ndaj Jordanisë, sakaq Mavraj dhe Gjimshiti pritet të mbajnë peshën kryesore në qendër të mbrojtjes, Hysaj në krahun e djathtë ndërsa Binaku ka një “sfidë” me Lenjanin, pasi ky i fundit dha sinjale pozitive në ndeshjen kundër Jordanisë.

Në mesin e fushës Xhaka dhe Basha pritet të jenë që nga minuta e parë e lojës, pasi nëse trajneri do të veprojë me 4-2-3-1, ata janë lojtarët më të mirë të mundshëm për të bërë lidhjen mes mbrojtjes dhe mesit të fushës.

Në treshen kryesore të mesfushës pritet që Grezda të jetë titullar i padiskutueshëm, ndërsa në qendër Memushaj dhe në krahun e djathtë mbetet Gavazaj. Ndërsa sulmi pritet t’i besohet Rey Manajt, edhe pse Bekim Balaj është gjithashtu në formë të mirë.

Nisur nga ato që u deklaruan nga vetë lojtarët pas ndeshjes miqësore me Jordaninë, gjasat janë që Shqipëria të rreshtohet me një tjetër skemë, ndoshta me 4-2-3-1, duke parë edhe nivelin e kundërshtarit. Kështu trajneri Panucci do të ketë më shumë mundësi të kontrollojë prapavijnë por njëkohësisht, kjo është dhe skema që i dha fitoren në ndeshjen e parë ndaj Izraelit në “Elbasan Arena”.

Statistika                                                                                     

– Në tri ndeshjet direkte të zhvilluara mes këtyre dy skuadrave janë regjistruar nëntë kartonë të verdhë dhe dy të kuq.

– Izraeli ka marrë një karton të verdhë ose më pak në shtatë nga dhjetë ndeshjet e fundit.

– 61 për qind të golave të shënuar nga Shqipëria në dhjetë ndeshjet e fundit kanë ardhur në pjesën e dytë.

VAZHDO TË LEXOSH MË TEPËR PËR TEMËN