Rona Nishliu është një nga përfaqësueset më të suksesshme të Shqipërisë në Eurovision, në vitin 2012, me këngën “Suus”. Madje në një renditje të përgjithshme ndër vite, kënga e saj është renditur në vendin e 24 në 250 këngët më të dëgjuara.
Këngëtarja ishte përfaqësuesja e parë e ftuar në kongresin e përvitshëm të organizatës së fansave të Eurosong në Spanjë. Në sesionin e pyetje-përgjigjeve, fansat spanjollë pyetën nëse Rona do të merrte pjesë përsëri në Festivalin Europian të këngës, Eurovision, por këtë herë si përfaqësuese e Kosovës.
Rona shpjegoi se punon në Radio Televizionin e Kosovës dhe është pjesë e grupit që po bën përpjekje t’i mundësojë pjesëmarrjen vendit të saj në këtë festë të përvitshme të këngës europiane.
Ajo u shpreh se mund të rikthehet në Eurovision për ta përfaqësuar vendin e saj, nëse kjo do ishte e rëndësishme për Kosovën.
