Dje është përsëritur skena e vitit 2002, kur Barrichello i hapte rrugën Schumacher-it dhe ky i fundit shpallej kampion bote. Parakalimi me urdhër nga lart që Lewis Hamilton bëri në dëm të Valtteri Bottas ishte momenti kyç i garës së Çmimit të Madh të Rusisë në Formula 1.
Piloti britanik fitoi garën e zhvilluar në Sochi, por fituesi moral i kësaj gare është finlandezi. Shefi i Mercedes, Toto Wolff shpjegon se për të nuk ka qenë aspak e lehtë të urdhëronte Bottas të hapte krahun, por sipas tij, ky veprim brenda “familjes” ishte i domosdoshëm.
“Vendosëm që të shkëmbejmë vendet mes Bottas e Hamilton pasi gabuam strategji. Në ‘pit-stop’ humbëm vendin e dytë, pasi vettel e parakaloi Hamilton dhe më pas piloti ynë dëmtoi gomat duke qëndruar pas ferraristit për dy xhiro”, – tha Toto Wolff, duke shpjeguar arsyen e këtij “parakalimi”.
Më tej, numri 1 i Mercedes shton: “Është gjithnjë e vështirë të japësh një urdhër të tillë dhe këtë herë ka qenë e vështirë për mua t’i thoja Bottas të linte Hamilton ta parakalonte. Por këto gjëra kanë ndodhur edhe më pare, edhe pse në këtë rast preferoj që të më kritikojnë.”
VAZHDO TË LEXOSH MË TEPËR PËR TEMËN
