Vitin e kaluar janë nënshkruar vetëm gjashtë kontrata me tarifën simbolike “1 euro”. Të dhënat tregojnë se aktiviteti, në shumicën e rasteve i përket regjimit të përpunimit aktiv të mallrave ose fasonerisë.
Në total, parashikohet të investohet, në një hark kohor 3-vjeçar, një shifër prej rreth 492 milionë lekë, në sipërfaqe totale toke prej rreth 140 mijë metra katrorë. Bazuar në kontratat e nënshkruara me gjashtë përfaqësuesit e sipërmarrjeve, të cilët kanë përfituar këto sipërfaqe më tarifën simbolike “1 euro”, rezulton se në përfundim të investimeve numri total i të punësuarve të jetë 407.
Nisma “1 euro” filloi që në qeverisjen 8-vjeçare të Partisë Demokratike, por ndonëse u dhanë disa prona për biznese ajo nuk funksionoi ashtu siç ishte parashikuar për shkak të një sërë rrethanash penguese si pronësia mbi tokën, moszbatimi i ligjeve apo edhe problemet me gjyqësorin.
Nga viti 2013, me ardhjen në pushtet të qeverisë së majtë, në ligjin përkatës u kryen disa ndryshime të rëndësishme me qëllim që nisma “1 euro” të funksiononte. Por, gjithsesi shifrat flasin vetë. Gjashtë kontrata, nga të cilat dy janë shtesa të kontratave ekzistuese, janë shumë pak për t’i dhënë një impuls real ekonomisë.
VAZHDO TË LEXOSH MË TEPËR PËR TEMËN
Bien investimet e huaja
Dossier/ Investimet që po vijnë nga Lindja
