Një ngjarje e rëndë ka tronditur Beratin, ku një çift të moshuarish janë hedhur nga kati i gjashtë i një pallati. Ngjarja ndodhi sot rreth orës 07:00, në vendin e quajtur “Pjeshkorja”, në lagjen “30 Vjetori”.
Burrë e grua, Kujtim dhe Këze Agalliu rreth 80 vjeç, janë gjetur në pajetë në vendin e quajtur “Pjeshkorja”, në lagjen “30 Vjetori”. Policia bën të ditur se trupat e pajetë janë konstatuar poshtë pallatit në ndërtim e sipër nga një patrullë rreth orës 07:00 të mëngjesit të kësaj të premte.
Nuk dihen motivet e kësaj ngjarje që çuan dy të moshuarit drejt aktit të vetëflijimit. Burrë e grua jetonin vetëm, pasi fëmijët jetonin jashtë vendit, ndërsa për ta kujdesej një grua e cila nuk ndodhej në banesë në momentin e ngjarjes.
Banorët e zonës janë shprehur se nuk i njohin dy të moshuarit pasi ata kishin pak kohë që kishin ardhur në apartamentin e sapondërtuar në këtë lagje.
Burime zyrtare nga policia bënë me dije se çifti i të moshuarve ka gjetur vdekjen. Të njëjtat burime thanë se ka dyshime që ata janë hedhur nga lartësia, e cila ka rezultuar fatale.
Deri më tani nuk dihen rrethanat e ngjarjes në fjalë, ndërsa grupi hetimor po punon për identifikimin e tyre.
