MENU

Deklarata

Bixhozi, Rama: Çmenduri që duhet të ndalojë, 500 mln euro i kthehen familjeve shqiptare

16.11.2018 - 22:20

Kryeministri Edi Rama ka qenë sonte në studion e emisionit “Shqiptarët për shqiptarët” më News24 ku ka folur pikërisht për fenomenin e bixhozit dhe nismën e qeverisë për t’i vënë kyçin në 31 dhjetor të këtij viti. Emisioni u ndal pikërisht në këtë plagë të shoqërisë.

Njeriu që i tha ‘JO’ bixhozit në Shqipëri foli në studio hapur dhe jashtë debateve politike ku tha ndër të tjera arsyet se si vendosi për të mbyllur përfundimisht lojërat e fatit dhe bastet. Kryeministri e nisi me një batutë me t’u akomoduar në studio: “Shyqyr që në këtë studio nuk të bërtasin ata që të ftojnë”.

Rama tha se bixhozi rrënon familjet por se sërish u përball me reagimin e shumë njerëzve që nuk e donin.

“Këtu ndalimi i aktivitetit që siç e tha Elvisi është shumë i përhapur është i lidhur me burimet kriminale të financimit. Unë e kam deklaruar këtë sfidë qysh në ditën e fitores së zgjedhjeve, e kam deklaruar me bindje të plotë që kjo i ka të gjithë të këqijat. Rrënon familjet, prindërit shkatërrohen, ajo që kam parë pasi bëra këtë deklarate, ishte reagimi i parë i njerëzve që nuk e donin këtë gjë. Hyjmë në një beteje për të luftuar pjesën informale”, tha kreu i qeverisë.

Ai u shpreh më tej se ishte një industri e mbështetur politikisht.

“Një nga momentet e mia të këqija si drejtues i shumicës ishte kur mbeta vetëm me Erion Braçen për të bërë një kompromis për ta shtyrë ketë. Fuqia e lobeve nuk është e vogël, kudo në bote është e fuqishme. U vendos të shtyhet për 31 dhjetorin e këtij viti. Kjo e basteve mori super xhiro. Ishim në Dibër në një mbledhje qeverie. Ishte një proteste që më urojnë mua mirëpritjen nga opozita. Më thonë shoqëruesit dalim nga rruga tjetër, ishte rruge 150 metra. Kishte rreth 20 lokale nga të dyja anët. 90% ishin baste, kazino, bingo, komplet rruga thashë: kjo është çmenduri duhet të ndalojë. Kur e shef atë pamjen këtu 68% e njerëzve e fillojnë 10 deri ne 15 vjeç, ikin nga shkolla dhe luajnë bixhoz”, rrëfeu kryeministri.

Duke folur për efektet pozitive që do i sjelli familjeve shqiptarë të prekura nga bixhozi, kryeministri Edi Rama tha se “në një llogari të përafërt, mbi 500 milionë euro shkojnë për llumin që financon ketë industri”.

“Tashmë kjo shumë do mbetet në familje për konsum. Këto para do futen në ekonominë e vendit. Do të krijohen biznese të tjera. Tregu do hapi biznese të tjera. Për ata që janë të punësuar, këta do hyjnë në kurset e kualifikimit. Ne do t’i trajnojmë dhe do t’i kualifikojmë, nuk është se mungojnë vendet e punës”, tha kryeministri.

Sipas Elvis Naçit një elitë e vogël u pasuruan por një shumicë e madhe u varfëruan ekonomikisht.

“Është një guxim. Unë e përgëzoj kryeministrin për ligjin bekuar qofshin njerëzit e mire qe mendojnë per shqiptarinë”, tha Naçi.