Ekspertët e ekonomisë e shohin me shqetësim vendosjen e tarifës për rrugën Tiranë Durrës.
Ky koncesion, sipas tyre, do të rëndojë bizneset që janë vendosur përgjatë aksit rrugor dhe kanë rreth 60% të aktivitetit që kryhet në Shqipëri.
Në këto kushte ata shprehen se dhe kostot duhet të jenë sa më minimale, si një stimul për zhvillimin e ekonomisë.
Një nga ekspertët e ekonomisë Besart Kadia thotë:
“Është vizioni i të ardhmes, ku Durrësi dhe Tirana do quhen dyrnaja, praktikisht do jetë një zonë e përbashkët ekonomike dhe për këto arsye nga këndvështrimi ekonomik do të ishte një hap pas për ekonominë e zonës nëse do bëhet me pagesë kalimi në këtë aks rrugor.”
Nga ana tjetër edhe drejtuesit e mjeteve shprehen të zhgënjyer për shtimin e taksave teksa thonë:
“E rëndon popullin, se ne do shtojmë biletën.”
“Ne i paguajmë taksat kur paguajmë taksat e makinës.”
Rruga Tiranë Durrës përshkohet nga 50 mijë automjete në ditë.
Në bazë të një përllogaritjeje në rast se ky numër mbetet i pandryshuar në 30 vjet të ardhurat e firmës nëse rruga do të faturohet me 2 euro për kalim do të jenë 1.1 miliardë euro ose 3 herë më shumë nga fitimi fillestar.
