Dhjetë firma ndërtimi janë të përfshira aktualisht në procese gjyqësore me Drejtorinë e Përgjithshme të Parandalimit të Pastrimit të Parave. Kompanitë i janë drejtuar Gjykatës Administrative për të anuluar gjobat e vendosura nga ky institucion.
Ato janë gjobitur sepse nuk kanë zbatuar procedurat e përcaktuara me ligj që i detyrojnë të identifikojnë klientët, burimet e fondeve, analizimin e transaksioneve e deri te moszbatimi i detyrimit për raportimin e transaksioneve në para fizike. Gjobat për këto lloj shkeljesh shkojnë nga 300 mijë lekë deri në 5 milionë lekë.
Investimi në ndërtim apo blerja e pasurive të paluajtshme vijojnë të mbeten një prej rrugëve kryesore për pastrimin e parave, ndërkohë që kompanitë e ndërtimit mbeten ndër subjektet më të ekspozuara kur vjen fjala te shkelja e legjislacionit në këtë drejtim.
Jo vetëm Drejtoria e Përgjithshme e Parandalimit të Pastrimit të Parave, por edhe Policia e Prokuroria janë shprehur se një pjesë e mirë e parave të ardhura nga krimi kanalizohen në tregun e pasurive të paluajtshme, ndërtimin e hoteleve e resorteve turistike.
Sipas ligjit, palët e lidhura me transaksionet në vlera të mëdha, si bankat, noterët apo firmat e ndërtimit janë të detyruara të raportojnë çdo transaksion të dyshimtë pranë Drejtorisë së Përgjithshme të Parandalimit të Pastrimit të Parave.
VAZHDO TË LEXOSH MË TEPËR PËR TEMËN
Bllokohen 1.5 milion euro, me gjasë burim aktiviteti kriminal
Partitë, 250 financime të dyshimta
