Ndërmarrjeve shqiptare çdo i punësuar i kushton mesatarisht rreth 62 mijë lekë në muaj. Anketa e kostove të punës e kryer nga Instituti i Statistikave tregoi se në harkun kohor të katër viteve, nga 2012 deri në 2016, kosto e punës për njësi në Shqipëri është rritur me 12%.
Kostot më të larta të punës i kanë degët e specializuara të shërbimeve, si sektori financiar dhe ai i telekomunikacioneve. Aktivitetet financiare dhe të sigurimeve kanë një kosto mesatare pune prej afro 125 mijë lekësh në muaj, të ndjekura nga informacioni dhe komunikacionet me 91 mijë lekë.
Kostot e punës përfshijnë të gjitha shpenzimet e punëdhënësit për punëmarrësin, që nga pagat, shpërblimet, benefitet e tjera të lidhura me punën, kontributet e sigurimeve, taksat dhe kostot e trajnimit.
Pagat zënë rreth 84% të kostove mesatare të punës, ndërsa shpenzimet për trajnim kanë një peshë modeste ndaj kostove totale të punës. Të vetmit sektorë ku kostot e trajnimit zënë mbi 1% të kostos totale të punës janë sektori financiar dhe ai i telekomunikacioneve.
Anketa e Kostove të Punës zhvillohet nga Instat me një frekuencë katërvjeçare, duke intervistuar të gjitha ndërmarrjet me më shumë se 10 punonjës.