Kryetari i gjykatës së Pukës, Izet Kadana, akuzohet se me anë të mesazheve telefonike, shantazhonte qytetaren për një vend pune, të cilën më pas e kishte fituar bashkëshortja e gjyqtarit.
Komisioni i Pavarur i Kualifikimit zhvilloi sot seancën dëgjimore me Kryetarin e Gjykatës së Pukës, Izet Kadana. Trupa gjykuese që ka kryer procesin e rivlerësimit për gjyqtarin përbëhet nga Lulzim Hamitaj, Xhensila Pine dhe Firdes Shuli.
Gjyqtari iu nënshtrua filtrave të Vettingut për tre kritere, atë të pasurisë, kriterin profesional dhe pastërtinë e figurës. Gjatë seancës dëgjimore më 18 dhjetor, përfaqësuesi i Operacionit Ndërkombëtar i Monitorimit, Theo Jacobs ngriti pikëpyetje për figurën e gjyqtarit.
Janë të paktën 19 mesazhe kërcënuese të dërguara nga gjyqtari ndaj një qytetareje, të cilës Kadana i shkruante “a e di ti kush jam unë” dhe “do ta shikosh çdo të bej”, gjë që solli edhe shpërthimin e Jacobs.
Sipas gjetjeve të KPK, e njëjta qytetare ishte shmangur nga gara për një vend pune, të cilën e kishte fituar bashkëshortja e gjyqtarit. Por mesazhet u interpretuan nga avokati si shprehje e zhgënjimit, çka solli shpërthimin e Theo Jacobs.
“Formulimi i fjalive në mesazhe nuk ishin të një personi të zhgënjyer, por ishin fjalë të dikujt që të kërcënon. Në 36 vjet eksperiencë si gjyqtar nuk kam parë asnjëherë kaq hapur që dikush të përdorë pozitën e tij për të influencuar një vendimmarrje publike për përfitime personale’-u shpreh përfaqësuesi i ONM-së, Theo Jacobs.
VAZHDO TË LEXOSH MË TEPËR PËR TEMËN
