Zyra e Regjistrimit të Pasurive njoftoi se janë në proces regjistrimi edhe 10 mijë leje legalizimi ndërkohë që në vitin 2018 u certifikuan rreth 9500 të tilla.
Kryeregjistruesi Valdrin Pjetri, u shpreh se objektivi i këtij viti është që deri muajin Korrik të ketë përfunduar regjistrimi i çdo leje legalizimi.
Sipas Pjetrit sfida e këtij institucioni është hipotekimi i çdo objekti që shkon përmes ALUIZNI-t.
“Në inventarin fizik që ne bëmë para pak ditësh në zyrën e Tiranës rezultojnë të jenë rreth 10 mijë leje legalizimi akoma të paregjistruara. Në vitin 2018 ky stok ishte rreth 20 mijë leje, 9500 u certifikuan vitin e kaluar. Kemi vendosur target që deri në korrik 2019 të përfundojmë regjistrimin e çdo leje legalizimi”, tha Pjetri.
Pjetri tha se shqetësim mbeten dokumentat e këtij institucioni që rrezikojnë të dëmtohen dhe për të shmangur këtë gjë pritet që të bëhet dixhitalizimi i materialeve.
“Do fillojë shumë shpejt procesi i dixhitalizimit. Sot në arkivat tona kemi rreth 47 milion fletë të akumuluara që në krijimin e shtetit shqiptar, të cilat ruhen akoma në arkiva manuale që rrezikojnë të prishen, vjetërohen etj.” nënvizoi kreu i regjistrimeve.
