Është ndarë nga jeta mbrëmjen e djeshme kompozitori i mirënjohur Kozma Lara. Ka qenë akademiku Vaso Tole ai që ka ndarë me miqtë lajmin e dhimbshëm të ndarjes nga jeta të muzikantit gjenial Kozma Lara.
Postimi i Vaso Toles
“Me dhimbje ndajmë në këtë orë të vonë, lajmin e ndarjes nga jeta të prof. Kozma Lara (1932-2019). Homazhet në nderim të Tij do të mbahen nesër në hollin e Universitetit të Arteve, ditën e shtunë, datë 19 janar 2019, nga ora 11.00-12.00.
I paharruar do të mbetesh profesori ynë”!
Kozma Lara lindi më 4 janar 1932 në Durrës.
Mësimet e para në piano, i kryen me Profesor Tonin Guraziu. Në vitet 1946-1949 mbaron shkollën e mesme të përgjithshme 16 Shtatori në Durrës. Ndjek Liceun Artistik Jordan Misja në Tiranë ku dhe diplomohet në degën e pianos me Prof. Tonin Guraziu në vitin 1954.
Në vitin 1958 studion në Konservatorin P. Iliç. Çajkovski në Moskë (ish BRSS), në degën e Kompozicionit, student i Profesorit Sergey Artem’yevich Balasanian.
Gjatë viteve ka kontribuar në Asamblin e Ushtrisë Popullore, në Teatrin e Operas dhe Baletit në Tiranë si Koncert Maestër dhe në Shkollën e Mesme të Muzikës Mujo Ulqinaku-Durrës.
Nga viti 1964 – 1972 kontribuon si Pedagog i Analizës dhe Kompozicionit, njëkohësisht Shef i Katedrës së Kompozicion-Dirigjimit në Konservatorin Shtetëror të Tiranës.
Në vitet 1972-1978 Inspektor, specialist për Muzikën në Ministrinë Arsimit e Kulturës, Tiranë. Deri në vitin 1979 Mësues i Harmonisë, Analizës dhe Orkestracionit pranë Shkollës se Mesme të Muzikës Jan Kukuzeli, Durrës.
Nga 1979 e në vazhdim Shef i Katedrës së Teori- Kompozicionit në Fakultetin e Muzikës, Pedagog i Analizës dhe Kompozicionit.
Ne 1995 e në vazhdim – në Pension. Kontribuoi si Pedagog i Jashtëm në lëndën e Analizës dhe Kompozicionit në Universitetin e Arteve, Tiranë.
Kompozitori i mirënjohur Kozma Lara është autor i shumë krijimeve muzikore: kuartete, trio, romanca, rapsodi etj, si dhe ka krijuar shumë këngë për fëmijë.
Ka qenë President i Shoqatës muzikore “Tonin Harapi”, i festivalit të përvitshëm të Romancës Shqiptare dhe anëtar i Lidhjes së Shkrimtarëve, Artistëve dhe kompozitorëve të Shqipërisë.
