MENU

Burg për 7 adoleshentë

Kavajë/ Përdhunohet në grup 13 vjeçarja

03.02.2019 - 13:40

Detaje të reja tronditëse janë zbuluar në lidhje me përdhunimin e një vajze 13-vjeçare, ndodhur në një shkollë të Kavajës, rast ky i denoncuar një ditë më parë nga ish-kryeministri Sali Berisha në profilin e tij në Facebook.

Në denoncimin e ish-kryeministrit Berisha thuhej se 13-vjeçarja ishte përdhunuar nga 8 djem të shkollës 9-vjeçare “Rilindja” në Kavajë dhe se kjo ngjarje ishte fshehur nga autoritetet përkatëse, madje drejtoresha e Zyrës Arsimore të Kavajës nuk kishte marrë asnjë masë ndonëse kishin kaluar 2 muaj.

Por pak orë pas publikimit të lajmit, disa nxënës të kësaj shkolle kanë raportuar për JOQ se përdhunuesit nuk kanë qenë 8, por 16 persona. Mësohet se 14 nga ta janë nxënës të shkollës “Rilindja”, ndërsa 2 të tjerë janë gjimnazistë.

Po ashtu raportohet edhe një detaj tjetër i tmerrshëm. Vajza e mitur nuk e kishte denoncuar ngjarjen, pasi djemtë e kërcënonin me publikimin e një videoje intime mes saj dhe të dashurit në rrjetet sociale apo dërgimin e saj në adresë të prindërve.

Ndërkohë sot gjykata e Durrësit ka dhënë masën “arrest me burg” për 7 adoleshentë të arrestuar një ditë më parë për abuzimin seksual në grup me të miturën. Ata akuzohen për për veprën penale “marrëdhënie seksuale ose homoseksuale me të mitur”. Të gjithë djemtë e lënë në burg kanë lindur mes viteve 2002-2004.

Në lidhje me këtë ngjarje është shpallur në kërkim edhe një 15-vjeçar tjetër.