Ditën e enjte në të gjitha lagjet e qytetit të Beratit është vënë re mungesa e ujit të pijshëm.
Fillimisht qytetarët kanë menduar se ka patur ndonjë ndërprerje të ujit të pijshëm që mund të zgjidhej shpejt, por pa rezultat. Situata vazhdon të mbetet e pandryshuar dhe në orët e para të mbrëmjes, ku uji i pijshëm mungon në të gjithë qytetin.
Drejtori i Ujësjellës Kanalizimeve në Berat, Pelivan Sinaj bëri me dije se pas verifikimeve në terren rezultoi se bëhej fjalë për një avari serioze në rrjet. Në afërsi të fshatit Pronovik, në Poliçan tubi kryesor i furnizimit me ujë, “fi 700 ml”, magjistrali që furnizon Beratin dhe Kuçovën është çarë.
Çarja e tubit mësohet se ka ndodhur gjatë natës për shkaqe ende të panjohura. Gjithë punonjësit e ujësjellësit, specialistët, mësohet se janë në terren dhe po punojnë për ngjitjen e tubit.
Sipas drejtorit Sinaj, parashikohet që gjatë orëve në vijim të riparohet dëmi, ndërkohë që pa ujë të pijshëm janë Berati dhe Kuçova.
