Paulin Preka lindi më 2 shkurt 1935, në qytetin e Shkodrës.
Kreu shkollën e mesme në qytetin e lindjes, spikati në Lëvizjen Amatore dhe u tërhoq si aktor profesionist në Estradën e Shkodrës duke krijuar aty një profil artistik origjinal për më shumë se 40 vjet karrierë.
Ka luajtur role të karaktereve të ndryshme në llojet e shkurtra të humorit, si komedi me një dhe disa akte, skeçe, dialogë, monologë, parodi, etj.
Aktrimi i tij spikati posaçërisht në mishërimin e personazheve pozitive, ku ai ishte i hijshëm, i natyrshëm dhe fin në skenë.
Krijoi një galeri figurash, kryesisht njerëz të mençur, ironik, thumbues, që dinë të tallen dhe të shpotisin plot lezet të tjerët, me një “seriozitet” të madh në dukje, ç’ka krijon pikërisht kontrapunktin komik.
Në aktrimin e Paulin Prekes bie në sy pozita aktive e personazhit si dhe një sjellje sa më pranë të vërtetës jetësore, duke shfrytëzuar me zgjuarsi situatën komike të krijuar.
Kjo metodë e çonte atë shpesh drejt stilit të interpretimit në një komedi se sa në zhanret e estradës a llojin e farsës.
Së toku me aktorët e mirënjohur të kësaj estrade si Tano Banushi, Hasan Smaja, Zyliha Miloti dhe Zef Deda, ai ka luajtur shumë pjesë e komedi të shkruara për estradë (Daja i burrit, Dhëndri nga Amerika, Fotografisti, Toka jonë, Kunati i shokut Xhemal, Trualli i zënë etj). Mban titullin “Artis i merituar”.
VAZHDO TË LEXOSH MË TEPËR PËR TEMËN
Nga hamall e biletashitës, u bë ‘Nderi i Kombit’!
U përjashtua nga Liceu Artistik dhe nuk mori asnjëherë diplomë!
