20.02.2019 - 16:37
Komisioneri për Zgjerim në Bashkimin Europian, Johannes Hahn ka zhvilluar ditën e sotme një takim me ministrin e Punëve të Jashtme, Gent Cakajn.
Hahn e ka njoftuar këtë takim me anë të një postimi në Twitter ku tregon se ka shprehur shqetësimin e tij në lidhje me tensionin në rritje midis qeverisë dhe opozitës.
“Takim i mirë me Ministrin e Punëve të Jashtme të Shqipërisë, Gent Cakaj. Unë përsërita se Shqipëria duhet të shfrytëzojë mundësinë që të vazhdojë më tej reformat për të përparuar në rrugën e saj BE. Në mënyrë të barabartë kam shprehur shqetësimin tim të madh në lidhje me tensionet në rritje midis qeverisë dhe opozitës.
Avancimi në rrugën drejt BE duhet të jetë mbi interesin e partisë dhe të përbëjë një qëllim kombëtar për të gjithë.”
