MENU
klinika

Numër i ulët aplikimesh

Zbardhet debati brenda KLP-së/ Kërkohet rritje page për SPAK

10.02.2019 - 16:14

Këshilli i Lartë i Prokurorisë shtyu afatin e pranimit të prokurorëve kandidatë për në SPAK deri në datën 21 shkurt por në mbledhjen e fundit anëtarët kanë ngritur një tjetër shqetësim për mungesën e aplikimeve.

Sipas anëtarëve të KLP-së, një element që mund të ketë ndikuar në mos shfaqjen e interesit për të kandiduar është paga mujore e cila sipas parashikimeve të tanishme ligjore, është vetëm 7 mijë lekë më e lartë për prokurorët e SPAK sesa për anëtarët e prokurorive të zakonshme në rrethe.

Në mbledhjen e datës 6 shkurt, ku në rend të ditës ka qenë vendimi për shtyrjen e afatit të aplikimeve, krahas këtij verdikti që është miratuar me shumicë votash, diskutimi kryesor ka qenë mundësia për një rritje të pagës mujore të prokurorëve të SPAK.

klgj-klp-konica.al

Anëtarët e Këshillit nga Prokuroria, si Kostaq Beluri apo Antoneta Sevdari, janë shprehur se një mënyrë për të nxitur aplikimet nga kandidatë kualitativë është rritja e pagës së prokurorëve të SPAK.

kolana e librave

Duke qenë se ata do të heqin dorë nga privatësia, pasi do të kontrollohen duke përfshirë edhe rrethin familjar si dhe do të hetojnë vepra penale si korrupsioni i zyrtarëve të lartë dhe krimi i organizuar, anëtarët e KLP kanë propozuar nisma ligjore për rritjen e pagës.

Kryetari i KLP-së, Gent Ibrahimi, ka njoftuar gjatë diskutimit vendosjen e kësaj çështje në rendin e ditës të mbledhjes së ardhshme të KLP-së.

Ibrahimi theksoi se ndryshimi i ligjit për SPAK do të ishte një nismë e vështirë në këto momente por ai ka shtuar se do të eksplorohen mundësi të tjera ligjore për ndërhyrje në këtë rast.

Deri në momentin kur afati i parë po skadonte, në KLP ishin dorëzuar 15 kandidatura nga prokurorët, aq sa është parashikuar të jetë edhe organika e SPAK.