Pas Liverpool-it, një tjetër klub i madh anglez është në lëvizje për të marrë portierin e Kombëtares shqiptare, Thomas Strakosha, që aktualisht luan me Lazion në Itali.
Sipas medieve italiane, Tottenham e sheh Strakoshën si një përforcim cilësor për të zëvendësuar kapitenin e saj dhe njëkohësisht të përfaqësueses franceze, Hugo Lloris.
Lloris është shfaqur në nivele të larta në vitet e fundit dhe vazhdon të jetë, por te Tottenham mendojnë për të ardhmen e kësisoj janë vënë në ndjekje të një portieri më të ri në moshë.
Ky interesim i bërë publik nga mediet italiane vjen pas atij të verës së kaluar nga Liverpool, i cili përfundoi duke zgjedhur Allison të Romës.
Kjo, pasi Lazio refuzoi çdo ofertë që i erdhi për portierin shqiptar, ndërsa edhe ky i fundit dukej i kënaqur në Itali dhe rinovoi kontratën e tij deri në vitin 2022.
Por në klube e shohin se ky mirëkuptim mes palëve ka nevojë edhe për një shpërblim, sidomos duke parë se vlera e Strakoshës vazhdon e rritet, ashtu si përmirësimi dhe niveli i paraqitjeve të tij.
Ndaj pritet që së shpejti të rinegociohet marrëveshja e bashkëpunimit dhe të përmirësohet kontrata, falë së cilës ai aktualisht përfiton 1 milion euro në vit, duke e rritur në nivelet e lojtarëve më të mirë të klubit italian.