Rikthimi i Zinedine Zidane si trajner duket i afërt. Pasi nuk u arrit marrëveshja te Manchester United, dy janë pistat kryesore për francezin, Chelsea ose Juventus.
Blutë e Londrës i kanë hedhur dorashkën e sfidës klubit torinez dhe këtë e bën të ditur tabloidi anglez “The Sun”, që zbulon se skuadra e Premier League-s ka vendosur të hidhet në sulm për francezin Zidane.
Zidane është projektuar si njeriu që do të ulet në stolin e tyre pas largimit të Sarrit, në rastin që tekniku italian do të dështojë në arritjen e objektivit të një prej trofeve europianë.
Nga ana tjetër, kampionët në fuqi të Italisë dëshirojnë të arrijnë ish-teknikun e Realit, një preferencë e presidentit Agnelli në rast të një lamtumire të Max Allegrit në fund të sezonit.
“Po, një ditë mund të kthehem në Torino, askush nuk e di se çfarë rezervon e ardhmja, por ajo mes meje dhe Juventusit sigurisht që mbetet një ndjenjë speciale”, – do të deklaronte Zidane disa kohë më parë
Trajneri francez, që ka hyrë në historinë e futbollit më tre trofe të Championsit radhazi në krye të Real Madridit, për ta mbyllur me lavdi aventurën e tij në stolin e klubit “Los Blancos”, mund të kthehet vërtet në Torino, edhe pse gjithçka varet nga planet e Allegrit.
Sidoqoftë, në rast se stoli i gjigantëve të Serisë A do të mbetet bosh, Juventusit do t’i duhet të luftojë një betejë të ashpër me Chelsea-n, ku Zidane njëherazi mbetet një preferencë e madhe e Roman Abramovich.
VAZHDO TË LEXOSH MË TEPËR PËR TEMËN
E thonë shifrat, Zinedine Zidane më i miri
Bayern Munchen “fut në rreth” Zidane
