Edhe pse dogjën unanimisht mandatet, ish-deputetët e opozitës nuk dëshirojnë të ngelen ‘thatë’ nga ana financiare.
Sipas informacioneve, 11 deputetë të opozitës kanë aplikuar pranë Institutit të Sigurimeve Shoqërore për të marrë pagesën shtesë, e cila është sa gjysma e pagës bruto që merrnin në Kuvend.
Në ligjin për statusin e deputetit parashikohet që ata të përfitojnë pagesën e cila jepet nga Instituti i Pensioneve. Në listën e siguruar nga TCH, bie në sy emri i ish-kryeministrit Sali Berisha dhe kryetares së Lëvizjes Socialsite për Integrim, Monika Kryemadhi.
Në listë bien në sy edhe emrat e Grida Dumës, Andon Frrokajt, Gent Strazimiri, Florjon Mima, Genc Pollo, Dhurata Çupi, Nard Ndoka si dhe Petrit Vasili. Sipas ligjit 8097, i vitit 1996, ish-deputetët përfitojnë pagesë kalimtare pas mbarimit të mandatit. Ligji parashikon se shuma shkon në masën 50% të pagës bruto të deputetit për aq vite sa kanë patur funksionin e deputetit, por jo më shumë se 3 vjet.
Rroga kalimtare merret nga Instituti i Sigurimeve Shoqërore, i cili i paguan duke filluar nga muaji i tretë i mbarimit të mandatit. Kjo pasi për dy muajt e parë ata kanë përfituar rrogën e plotë nga Kuvendi. Në këtë mënyrë, rroga kalimtare fillon nga 21 prilli kur bëhen dy muaj nga djegia e mandateve nga opozita.
Ndërkohë, një pjesë e deputetëve të opozitës kanë bërë padi në Gjykatën Administrative kundër Kuvendit, duke kërkuar pagat e muajve kur ata kanë qenë në bojkot parlamentar.
VAZHDO TË LEXOSH MË TEPËR PËR TEMËN
