MENU

Produkte ushqimore të sigurta

Siguria ushqimore/ Ministria e Bujqësisë: Nuk ka vend për alarm!

26.04.2019 - 20:11

Siguria ushqimore e disa prodhimeve me bazë bimore dhe shtazore është bërë ditëve të fundit objekt debati publik.

Ministria e Bujqësisë dhe Zhvillimit Rural reagoi këtë të premte me një deklaratë duke theksuar se nuk ka vend për alarm. Sipas kësaj të fundit sot në tregjet shqiptare ka produkte ushqimore të sigurta dhe të certifikuara sipas standardeve të sigurisë ushqimore të garantuara me ligj dhe akte rregullatore.

Për këtë ajo ka argumentuar se institucionet në varësi të Ministrisë së Bujqësisë dhe Zhvillimit Rural monitorojnë dhe raportojnë rregullisht lidhur me sigurinë e prodhimeve vendase.

“Ato kanë marrë masat përkatëse ndaj çdo rasti abuzimi që kanë zbuluar këto institucione ose që janë bërë publike në media, deri në pezullim të aktivitetit prodhues të subjekteve që kanë kryer shkelje të ligjeve dhe standardeve në fuqi”, thuhet në deklaratë.

Po kështu sipas ministrisë, prodhimet bujqësore shqiptare konkurrojnë sot në tregjet ndërkombëtare.

“Shqipëria është një nga vendet kryesore të eksportit të prodhimeve bujqësore në rajon ndërsa janë rritur ndjeshëm eksportet drejt vendeve të BE-së. Vetëm për vitin 2018, vlera e produkteve bujqësore vendase të eksportuara në Itali është 8.5 miliard lekë, në Greqi 2.9 miliard lekë, Suedi 2.2 miliard dhe Gjermani 1.4 miliard. Eksporti i domateve Shqiptare është trefishuar në volum nga rreth 25 mijë ton në vitin 2013 në rreth 75 mijë ton në fund të 2018 dhe pesëfishuar në vlerë duke arritur në 4.4 miliard lekë në 2018. Kjo rritje e eksporteve të prodhimeve vendase dëshmon se fermerët shqiptarë ofrojnë produkte të cilësisë së të lartë dhe të sigurta. Deri më tani nuk ka pasur kthime mbrapsht të prodhimeve bujqësore nga Shqipëria për shkak të treguesve të sigurisë ushqimore që lidhen me nivelin e pranisë së pesticideve”, vijon deklarata.

Ministria thekson se sa i takon importeve të produkteve bimore dhe shtazore, më specifikisht importi i mishit të gjedhit, derrit dhe shpendit nga Brazili, që në vitin 2017 ushtrohen kontrolle zyrtare të autoriteteve kompetente të sigurisë ushqimore në masën 100% të ngarkesave të ardhura.

“Në Shqipëri ekzistojnë strukturat e përshtatshme për të bërë kontrollin e sigurisë së prodhimeve blegtorale e bujqësore. Instituti i Sigurisë Ushqimore dhe Veterinarisë (ISUV) me një përvojë mbi 90 vjecare, bën kontrollin e sigurisë ushqimore, të shëndetit të kafshëve dhe mbrojtjen e bimëve, ka rreth 33 laboratorë teknikë të disiplinave të ndryshme. Vetëm vitet e fundit janë investuar mbi 3 milion euro në pajisje laboratorike për sigurinë ushqimore me teknologji bashkëkohore europiane. Këta laboratorë përdorin metoda për kryerjen e analizave konform protokolleve ndërkombëtare dhe teknikave instrumentale të përdorura nga laboratorët e referencës në BE. Në vitin 2018, ISUV kreu mbi 60 000 analiza të lidhura me sigurinë e prodhimeve bujqësore dhe blegtorale. Për të mbuluar të gjithë gamën e analizave të nevojshme

për garantimin e sigurisë ushqimore, ISUV sot bashkëpunon me laboratorë dhe institute shkencore prestigjioze të vendeve të BE në Belgjikë dhe Itali.

Në 5 vitet e fundit investimet në industrinë agropërpunuese, veçanërisht të qumështit, arrijnë vlerën prej rreth 673 milion lekë. Ato kanë sjellë rritjen e kapaciteteve të përpunimit me teknologji moderne që garanton plotësisht standardet e sigurisë dhe cilësisë së produkteve dhe nënprodukteve të tij. Sot stabilimentet e përpunimit të qumështit janë të pajisura me certifikata ndërkombëtare të sigurisë HAÇP dhe ISO.

Garantojmë qytetarët se siguria ushqimore mbetet prioritet i punës së Ministrisë së Bujqësisë dhe Zhvillimit Rural dhe programit të qeverisë në kuadër të sigurisë kombëtare. Nuk do të ketë tolerancë ndaj askujt që abuzon me ushqimet dhe jemi të vendosur për të zbatuar me rigorozitet ligjin në çdo rast që konstatohet se është cënuar siguria ushqimore.

Autoriteti Kombëtar i Ushqimit ka nisur menjëherë verifikimet dhe kontrollet në terren për rastet e denoncuara në media. Minitria e Bujqësisë dhe Zhvillimit Rural dhe të gjitha institucionet e varësisë mbeten të vendosur për t’i shkuar deri në fund cdo rasti abuziv të konstatuar. Njëkohësisht inkurajon Prokurorinë të çoje përpara hetimet dhe të vendosë përpara ligjit këdo që cënon sigurinë ushqimore” mbyllet reagimi.

VAZHDO TË LEXOSH MË TEPËR PËR TEMËN


Rritje globale e kalorive/frymë

Njerëzimi e ka fituar luftën me urinë kësisoj