Maqedonia e Veriut ka marrë garanci me shkrim për çeljen e bisedimeve të anëtarësimit në tetor.
Pas deklaratave të kryeministrit Zoran Zaev, edhe kancelarja gjermane Angela Merkel, u zotua se do të bëjë çdo gjë të mundur për të caktuar një datë për fillimin e bisedimeve. Ndërsa për Shqipërinë nuk ka asnjë vendimmarrje.
Kancelarja gjermane, Angela Merkel, u zotua se do të bëjë çdo gjë të mundur për të caktuar një datë për fillimin e bisedimeve të anëtarësimit për Maqedoninë e Veriut në tetor.
Duke folur nga Brukseli pas samitit të udhëheqësve të BE-së, kancelarja tha se ishte çështje javësh.
Duke iu përgjigjur interesit të gazetarëve Merkeli tha se krerët e BE-së kishin diskutuar të enjten për Maqedoninë e Veriut.
“Do të bëj gjithçka që mundem për një vendim pozitiv për shkak se Maqedonia e Veriut ka bërë një punë shembullore me arritjen e ‘Marrëveshjes së Prespës’ dhe ne kemi biseduar për këtë. Është çështje e javësh, me të vërtetë, përkushtimi ynë qëndron dhe sa më takon mua, do të përdor të gjithë peshën time politike për këtë.”
Para samitit të udhëheqësve të BE-së, kryeministri i Maqedonisë së Veriut Zoran Zaev, deklaroi se vendi ka marrë garanci me shkrim për çeljen e negociatave në tetor.
Ndërsa për Shqipërinë nuk ka asnjë vendimmarrje. Ministri i Jashtëm rumun, George Ciamba, vendi i të cilit mbajti kryesimin e radhës së Këshillit të BE-së, tha se kriza politike në Shqipëri ka ndikuar te disa vende anëtare.
“Kur është fjala për Shqipërinë, konflikti i brendshëm politik është pengesë kryesore për hapjen e bisedimeve të anëtarësimit me BE-në dhe kriza po ndikon në vlerësimin e disa shteteve anëtare.”
