MENU

Takimi me Macron

Presidenti i Ganës: Ndryshim i lidhjeve Afrikë-Evropë

12.07.2019 - 12:52

Afrika duhet të ndryshojë marrëdhëniet e saj me Europën nëse dëshiron të shfrytëzojë burime të pasura që mund të transformojnë kontinentin, tha presidenti i Ganës.

“Afrika dhe Evropa janë partnerë të natyrshëm, por është një marrëdhënie që duhet të jetë ndryshe nga ajo që kemi patur deri tani”, tha Nana Akufo-Addo të enjten pas bisedimeve me homologun e tij francez Emmanuel Macron.

Vërejtjet e tij u bënë në një fjalim për 400 përfaqësues të diasporës afrikane në Francë, të mbledhur në pallatin Elysee në Paris.

“Kjo marrëdhënie ka pasuruar Evropën, por nuk ka pasuruar Afrikën. Pra, ne duhet ta ndryshojmë atë dinamikë”, tha Akufo-Addo.

“Pra, President, ne po themi se ka ardhur koha që ne të marrim fatin tonë në duart tona”, tha ai, duke iu drejtuar direkt Macronit.

Një ish-koloni britanike, Gana nuk ka të njëjtat lidhje historike me Parisin si kolonitë e tjera franceze në Afrikën Perëndimore.

Që nga marrja e detyrës në vitin 2017, Akufo-Addo e ka vënë theksin në inkurajimin e të mërguarve afrikanë për t’u kthyer në shtëpi, veçanërisht ata në Shtetet e Bashkuara.

Dhe diaspora mund të luajë një rol kyç në Afrikë, ashtu siç bëri në Kinë, transformimi i të cilës u nxit në masë të madhe nga nivelet masive të investimeve nga komuniteti i saj jashtë shtetit, tha ai.

“Ky zhvillim i Kinës ka ndryshuar statusin dhe pozitën e kinezëve në të gjithë botën,” tha ai.

VAZHDO TË LEXOSH MË TEPËR PËR TEMËN