Presidenti ukrainas Volodimir Zelenskiy po shkon në Toronto për bisedime me zyrtarët më të lartë kanadezë dhe për të marrë pjesë në një konferencë ndërkombëtare që synon mbështetje për procesin e reformave të Ukrainës dhe rrugën e saj drejt integrimit euroatlantik.
Gjatë udhëtimit të tij në 1-3 korrik, Zelenskiy do të marrë pjesë në Konferencën e tretë të reformës në Ukrainë, e cila pritet të mbledhë së bashku më shumë se 300 vetë, duke përfshirë ministrat e jashtëm, krerët e institucioneve ndërkombëtare dhe aktivistët e shoqërisë civile.
Zelenskiy do të takohet edhe me kryeministrin kanadez Justin Trudeau, Ministren e Jashtme Chrystia Freeland, anëtarët e parlamentit dhe përfaqësuesit e biznesit, sipas zyrës presidenciale të Ukrainës.
Zelenskiy dhe Trudeau do të diskutojnë “përpjekjet e reformës së Ukrainës në rrugën e saj drejt integrimit euroatlantik, gjendjen e sigurisë në rajon dhe si të thellojnë më tej marrëdhëniet tregtare Kanada-Ukrainë”, tha në një deklaratë zyra e kryeministrit kanadez.
Zelenskiy u përurua si president më 20 maj. Vizita e tij në qytetin juglindor kanadez vjen përpara zgjedhjeve të parakohshme parlamentare në Ukrainë të vendosura për në 21 korrik.
Konferenca e Reformës në Ukrainë do të zhvillohet nga 2 deri në 4 korrik.
“Duke u vendosur midis zgjedhjeve presidenciale dhe parlamentare, kjo konferencë vjen në një kohë të përshtatshme për të përforcuar themelet e reformës demokratike dhe për të ruajtur vrullin e krijuar në konferencat e mëparshme të mbajtura në Londër në 2017 dhe Kopenhagë vitin e kaluar”, tha qeveria kanadeze në një deklaratë .
Zelenskiy u zotua se nën udhëheqjen e tij Ukraina do të zbatojë reformat dhe do të intensifikojë luftën kundër korrupsionit dhe ripohoi rrugën e vendit drejt anëtarësimit në Bashkimin Evropian dhe në NATO.
Moska e ka bërë të qartë kundërshtimin e saj ndaj zgjerimit të mëtejshëm të NATO-s, veçanërisht sa i përket Ukrainës dhe Gjeorgjisë.
VAZHDO TË LEXOSH MË TEPËR PËR TEMËN
Zelensky do që Ukraina të qëndrojë larg Amerikës?
Zelensky refuzon ofertën e Putinit
Nga serialet komike në garën për president….
