Kreu i Grupit Parlamentar të Partisë Socialiste, Taulant Balla, ka paralajmëruar kryeopozitarin Lulzim Basha se në shtator do të përballet me prova të forta për përfshirje në pastrim parash dhe lobime të paligjshme.
Numri dy i PS sqaroi lajmet e publikuara në disa media, se këshilltari i Angela Merkel, Martin Henze, ngre dyshime për lidhjen e Ballës me mafien në vend.
Lidhur me këtë, Taulant Balla deklaroi se Henze nuk është këshilltar i kancelares gjermane, por një mashtrues, që paguhet nga Lulzim Basha dhe shitet në Tiranë si i tillë.
“Unë nuk e di kush është ai. Është një mashtrues. Në shtator do të kemi prova si ky person e ka përfshirë Bashën në histori pastrimi parash dhe lobimi të paligjshëm. Nuk përfaqëson asgjë, nuk është askush, por thjesht dhe vetëm një person që paguhet nga Lulzim Basha dhe shitet në Tiranë si këshilltar i Merkel”, tha Balla.
Kreu i Grupit Parlamentar të Partisë Socialiste, Taulant Balla, i ka bërë thirrje kreut të Partisë Demokratike, Lulzim Basha, dhe gjithë opozitës, të heqin dorë nga urdhrat.
Ai tha se Basha kishte urdhëruar sot kryebashkiakun e Kamzës, Xhelal Mziu, që të mos i lironte zyrën pasardhësit të tij të PS, Rakip Suli.
Lidhur me këtë, ai tregoi kohën kur ka qenë pjesë e kabinetit të Fatos Nanos, duke thënë se 3 muaj para se të dorëzonte pushtetin, e gjithë qeveria kishte bërë një punë intensive për përgatitjen e dosjeve.
“PD të heqë dorë nga urdhrat. Më thanë sot se Mziu është urdhëruar nga Basha për të mos liruar zyrën. Kam punuar na kabinetin e Fatos Nanos dhe them që 3 muaj para dorëzimit të pushtetit kanë qenë intensive për përgatitjen e dosjeve.
Ky është një mandat i rëndësishëm dhe i veçantë, pasi edhe zgjedhjet e 30 qershorit ishin të veçanta. Ishin përgjegjësi e madhe për ne. Niveli i papastërtive ishte i tmerrshëm, ka disa punë konkrete. PD në gjithë këto vite nuk arriti të kishte një model të vetin të qeverisjes vendore. Ne kemi plot modele të suksesshme të qeverisjes dhe jam shpresëplotë se në 60 bashkisë ku PS qeveris do mundohemi ta zgjerojmë këtë model të mirë. Këto modele na kanë bërë të jemi të vetëdijshëm për nevojën për t’iu shërbyer njerëzve me seriozitet dhe përkushtim.
Jam njohur sot në disa bashki ku kanë qeverisur përfaqësues të opozitës, PD e LSI, me kontrata të paligjshme të lidhura dhe në orët e fundit të largimit, që janë të dëmshme. Është detyrë e kryetarëve të rinj që t’i bëjnë publike”, tha Balla.
Më tej, Taulant Balla iu përgjigj dhe Presidentit Ilir Meta, i cili vijon t’i kthejë mazhorancës ligje në Kuvend.
Sipas tij, ky nuk është më një President i paparashikueshëm, ndërsa ngre dyshime për funksionimin e zyrës së tij, teksa ai ndodhet me pushime në mal.
“Ky President nuk është më i paparashikueshëm. Edhe kur është në majë të malit, nxjerr dekrete dhe kjo bën të kesh dyshime për mënyrën e funksionimit të zyrës së tij. Por kur ka bërë faje më të rënda, këto të voglat nuk na bëjnë më përshtypje.
Dua të sqaroj gafën skandaloze të bërë nga Presidenti, i njoftuar sot me dekretin për ta kthyer në Kuvend. Klasa e parë e fillores e di mirë se një ligj mund të hyjë në fuqi ditën që Presidenti jep dakordësimin, ose 15 ditë pas botimit në Fletoren Zyrtare. Ligji ka qenë që prej muajit shkurt dhe kam kërkuar të hyjë në fuqi edhe me pëlqimin e opozitës. Me këtë President Republike, gjithçka kthehet mbrapsht. Meta e pranon që ligji është i mirë. Me ç’sy e faqe mund t’i dalë para popullit ky President e t’iu thotë arsyen e kthimit të ligjit?”, deklaroi socialisti.
