Një film që ngjall jo pak diskutime, vjen si përfaqësues i kinemasë shqiptare. “Derë e hapur” është filmi me regji nga Florenc Papasi, që përfaqëson Shqipërinë në garën kryesore të Festivalit të Filmit në Sarajevë, edicioni i 25-të ai i këtij viti.
Elma, një vajzë e re shqiptare, e cila jeton ilegalisht në Itali, është personazhi kryesor i filmit. Ajo është në pritje të një fëmije, ndërsa babai i foshnjes është në burg. Pas deportimit nga policia italiane dhe në rrethanat ku ajo nuk di kujt t’i drejtohet për ndihmë, vendos të kthehet tek motra e saj e madhe, Rudina. Të dy motrat do të nisin një rrugë të gjatë me veturë, drejt shtëpisë së babait.
I gjithë filmi vërtitet rreth një teme shumë të komplikuar dhe gjithmonë aktuale: përplasja mes tradicionales dhe modernes, lufta gjithmonë e hapur mes brezave.
Mbështetur nga Qendra Kombëtare e Kinematografisë, me producent Eno Milkanin, “Derë e hapur” është bashkëprodhim mes Shqipërisë, Kosovës, Italisë dhe Maqedonisë.
Kujtojmë, se edicioni i këtij viti i Festivalit të Filmit në Sarajevë, do të mbahet prej datës 16 deri më 23 gusht./Konica.al
VAZHDO TË LEXOSH MË TEPËR PËR TEMËN
‘Streha mes reve’, një film që kalon kufijtë
‘Derisa të besosh te vetja, nuk ke për të pasur një jetë’
