Ministrja e Financave dhe Ekonomisë, Anila Denaj deklaroi sot se Fondi i Emergjencave i paprekur duke shprehur gatishmërinë për alokimin e fondeve shtesë në varësi të nevojave që do të lindin pas verifikimeve.
Në deklaratën për mediet, pas mbledhjes së zhvilluar në Prefekturën e Durrësit për masat që po merren pas tërmetit të ndodhur dje, Denaj tha se “ne jemi duke vizituar të gjithë zonat, jemi shpërndarë dhe kemi filluar nga Tirana e më pas vijuam në Durrës. Sigurisht janë dëme në banesa, por edhe në biznese. Në zonën e Shijakut kam informacion se ka shumë dëme në biznese. Jemi duke i vlerësuar të gjitha këto dëme, nëpërmjet organizatave të caktuara, duke filluar nga Instituti i Ndërtimit, ashtu dhe nga inspektorët e Fondit të Emergjencave. Do të kemi një vlerësim brenda dy javëve”, tha ministrja.
Ajo theksoi se “dëmet për atë tërmet që ndodhi janë minimale”, duke shtuar se “Fondi i Emergjencave nuk është prekur pasi nuk jemi goditur nga situata emergjente këtë vit”.
“Ai fond ju garantoj që është i paprekur. Qeveria është e gatshme në të gjitha skenarët që janë diskutuar dje në Ministrinë e Financave që të alokojë fonde shtesë në varësi të nevojave që do të vijnë dhe verifikimeve në terren nga strukturat përkatëse. Kështu që, në këtë aspekt kjo pjesë e financimi është e garantuar.
Nuk duhet të harrojmë edhe aspektin psikologjik, të kthimit në banesë. Vizitova disa banesa në zonën e Liqenit të Thatë në Tiranë, ku disa nga plasaritjet, por jo vetëm kishin krijuar pasigurinë nëse banorët duhet të ktheheshin në banesa ose jo. Për këtë inspektoratet përkatëse janë duke vlerësuar qëndrueshmërinë e godinave dhe kjo do të krijojë një farë qetësie të panikut të krijuar”, tha Denaj.
“Të gjithë kemi qenë në panik. Në forma nga më të ndryshme e kemi jetuar atë dhe me fëmijët tanë dhe e kishim më të vështirë për ta shpjeguar situatën. Kërkohet mbi të gjitha qetësi. Është e panevojshme të flasim vetëm për dëmet financiare, dëmet psikologjike janë ato që duhet të vlerësojmë në këto momente, por duke garantuar që këto dëme në çfarë do lloj shume që të vijnë duke u vlerësuar sipas strukturave përkatëse në vlerat e tyre financiare do të jenë plotësisht të mbuluara nga buxheti i shtetit.
Nuk lë pa përmendur këtu në mënyrë absolute edhe nevojën që të gjithë të solidarizohen. Para një jave isha në Qafë Zezë dhe kam vizituat banesat, të cilat nga tërmeti ishin rrënuar totalisht. Akorduam një fond të dhënë nga Shoqata Shqiptare e Bankave dhe kjo është një mënyrë shumë e mirë dhe për të kontribuar”, u shpreh ajo.
VAZHDO TË LEXOSH MË TEPËR PËR TEMËN
Rama viziton familjet e prekura nga tërmeti në Tiranë
