Richard Stengel, një ish-redaktor i Times, i cili u bë nënsekretari i Departamentit të Shtetit për diplomacinë publike, shkruan se ai dikur ishte “idealist” i informacionit.
Ai besonte se në tregun e ideve, e vërteta përfundimisht do të mbizotëronte. Jo më.
“Unë mendoj se të gjithë ne e dimë se kjo është një ëndërr boshe,” shkruan Stengel. “Fatkeqësisht, një fjali e rremë lexohet njësoj si ajo e vërtetë. Nuk është e mjaftueshme të përballësh gënjeshtrën me të vërtetën; e vërteta jo gjithmonë fiton”.
Ky libër mbart një mesazh të qartë dhe të frikshëm: Shtetet e Bashkuara po humbin luftën për atë që rusët e quajnë “hapësirë informacioni”.
Paradoksi mizor i Internetit është se ai fuqizon qeveritë që kontrollojnë informacionin.
Rrëfimi i Stengel, i cili do të botohet në tetor, titullohet “Luftërat e informacionit: Si e humbëm betejën globale kundër dezinformimit dhe çfarë mund të bëjmë rreth tij.”
Është një histori se si burokracia e qeverisë, inercia dhe, mbi të gjitha, kufizimet e qenësishme të një shoqërie të hapur, demokratike i bënë Shtetet e Bashkuara aq të prekshme ndaj veprimeve të fshehta përmes Internetit.
“Le ta pranojmë, demokracitë nuk janë shumë të mira në luftën kundër dezinformatave,” shkruan Stengel.
Stengel ishte redaktor menaxhues i Times dhe një gazetar shumë i respektuar, kështu që ai u bashkua me administratën Obama në vitin 2014 për të mbikëqyrur komunikimet e Departamentit të Shtetit. Detyra e tij ishte të luftonte mesazhet anti-amerikane. Por ai provoi se pse qeveria nuk funksiononte.
Kur Stengel mori postin e tij, sfida e madhe ishte kundërshtimi i mesazheve ekstremiste nga Shteti Islamik. Departamenti i Shtetit kishte një njësi të quajtur Qendra për Komunikime Strategjike kundër-terrorizmit, e cila ishte themeluar nga Hillary Clinton në vitin 2011. “Që nga momenti i lindjes së saj, CSCC ishte një fëmijë me probleme,” shkruan Stengel.
Ai pranon sinqerisht se administrata e Obamës reagonte ngadalë ndaj manipulimeve të zgjedhjeve të Rusisë në vitin 2016. “Shkalla e dezinformatave ruse ishte përtej asaj që ishim në gjendje t’i përgjigjeshim,” shkruan ai.
Por ai është skeptik kur thonë që ndërhyrja ruse ishte vendimtare në vitin 2016. “Deri më sot, nuk jam i sigurt se çfarë ndikimi ka pasur,” shkruan ai. Stengel dokumenton ndjeshmërinë tonë ndaj manipulimeve, të huaja dhe vendase.
Ai argumenton për vetë-rregullimin e ekosistemit nga i cili varen gazetarët dhe reklamuesit. Ai përgëzon rritjen e sistemeve të vlerësimit të lajmeve dhe përdorimin e inteligjencës artificiale për të zbuluar dhe fshirë përmbajtje false.
“Luftërat e Informacionit” duhet të jenë një thirrje zgjimi. Zgjedhjet e lexuesve dhe shikuesve janë vendimtare.
VAZHDO TË LEXOSH MË TEPËR PËR TEMËN
Lufta hibride SHBA-Rusi
SHBA-Rusi, betejë për ndikim në Venezuelë
Traktati SHBA-Rusi për armët, zyrtarisht ‘i vdekur’
