MENU
klinika

Vendimi për 5 mijë votat

Fati i koalicionit Nisma – AKR, në duart e diasporës

28.10.2019 - 10:58

Paneli Zgjedhor për Ankesa dhe Parashtesa (PZAP) pritet të mblidhet sot dhe të marrë vendim për numërimin e rreth 5 mijë votave të diasporës, të cilat kishin arritur në Kosovë me vonesë, pavarësisht që ato ishin nisur me kohë.

Koalicioni Nisma – AKR ka marrë votat e mjaftueshme për të kaluar pragun, kështu ka thënë për “Zërin” kandidati për deputet nga AKR-ja, Fatmir Matoshi, sipas së cilit ky koalicion ka marrë 5,017 për qind të votave.

Megjithatë, ndonëse thotë se e kanë kaluar pragun, Matoshi ka deklaruar se numërimi i rreth 5 mijë votave të diasporës mund të ndryshojë rezultatin e tyre, si rrjedhojë ata nuk do të mundë ta mbajnë kuotën e 5-përqindëshit.

“Ajo që e kam parë është se në bazë të provave që i kemi ne si koalicione, e kemi kaluar pragun. Se çfarë do të ndodhë me 4 mijë e 500 votat që pritet të numërohen është çështje tjetër. Mundemi që ne të mos kemi vota të mjaftueshme për ta ruajtur kuotën e 5-përqindëshit dhe mundemi të biem prapë”, ka thënë ai.

Matoshi ka theksuar se nëse nuk numërohen votat e diasporës koalicioni Nisma – AKR do të jetë pjesë e Kuvendit të Kosovës.

“Nëse ato vota nuk numërohen, ne në bazë të të dhënave që i kemi e kemi kaluar pragun. Këtë e ka konfirmuar KQZ-ja, por nëse ato numërohen, atëherë ne mund ta përmirësojmë situatën, por ka mundësi që edhe të mos kemi vota tonat aty”, ka thënë ai.