Viti i ri akademik nisi me më pak studentë në Universitete për shkak të mesatares dhe faktorëve të tjerë, 11 degë rrezikojnë të mbyllen në Universitetin e Elbasanit.
3 Degë në Vlorë, 4 në Gjirokastër dhe Fizika në Universitetin e Shkodrës janë me zero regjistrime.
Universiteti “Aleksandër Xhuvani” në Elbasan, e nisi pa ceremoninë zyrtare vitin e ri akademik.
Me 1500 regjistrime nga 3080 kuota, 11 degë atje rrezikojnë të mbyllen.
Katër degë nuk kanë asnjë student këtë vit në Universitetin “Eqerem Çabej” në Gjirokastër, ku viti i ri akademik nisi për 505 studentë.
“Ajo që është një problem jo vetëm për Universitetin e Gjirokastrës, por për të gjitha universitetet që kanë programet e mësuesisë janë prurjet e pakta në këtë drejtim. Kjo vare me tregun e punës”
Fizika, Kimia dhe Italishtja nuk kanë asnjë student të Regjistruar në Universitetin Ismail Qemali në Vlorë, ku 800 të rinj nisën vitin akademik, ndërsa infermieria është dega më e kërkuar.
“Në programin e studimit të Italishtes, Kimisë dhe Fizikës është viti i dytë që nuk kemi të regjistruar asnjë student. Ne do presim edhe përfundimin e raundit të tretë dhë me pas do fillojmë të projektojmë rivlerësimin e këtyre programeve të studimit dhe bashkëngjitjen e tyre pranë programeve të studimit të Matematikës për Fizikën, Biologjisë për Kimin dhe tek riorganizmi i italishtes në një formë tjetër”.
Asnjë student nuk ka zgjedhur fizikën në Universitetin e Shkodrës ku në dy fazat e para janë regjistruar 950 studentë.
Ceremonia u mbajt në godinën e Fakultetit Ekonomik e cila vitin e kaluar u bë shkak i përplasjeve mes studentëve dhe rektoratit.
“Degët do jenë me një numër të kufizuar, për arsye se numri i nxënësve po ulet”
Drejtuesit e Universiteteve të Rretheve thonë se do të presin përfundimin e fazës së tretë të regjistrimeve për të vendosur përfundimisht për mbylljen e programeve të studimit pa asnjë student.
