Një tjetër stadium është kthyer në strehim për të prekurit nga tërmeti i sotëm që tronditi Shqipërinë, sidomos qytetin e Durrësit, ku ka pasur tragjedi në njerëz, por edhe dëme të rënda në banesa, që janë kthyer në të pabanueshme.
Shumë persona kanë mbetur jashtë shtëpive të tyre dhe i janë drejtuar menjëherë stadiumit “Niko Dovana” në Durrës. Të sistemuar në fushën stërvitore pranë stadiumit, por edhe në ambientet e brendshme, ata kanë marrë ndihmën e parë nga vullnetarët.
Gjatë natës fushat do të kthehen në kamp pritje me çadra të vendosura për familjet dhe njerëzit që nuk mund të kthehen në banesat e tyre. Pritet që situata të vazhdojë për disa ditë, duke e kthyer stadiumin dhe aneksin e tij në një qendër të mirëfilltë pritjeje të të pastrehëve.
Federata ka shtyrë ndeshjet e kampionatit në fundjavë, kështu që për momentin mund të qëndrojnë aty. Edhe stadiumi “Selman Stërmasi” në kryeqytet është vënë në dispozicion të njerëzve në nevojë.
VAZHDO TË LEXOSH MË TEPËR PËR TEMËN
