Gjermania dhe Franca duhet të zhdukin dallimet e tyre dhe të ndjekin një partneritet konstruktiv me ide konkrete, tha një aleat i kancelares gjermane Angela Merkel pas një përplasjeje publike midis dy peshave të rënda të Bashkimit Evropian për NATO-n.
Marrëdhëniet midis fqinjëve, tradicionalisht boshti i bllokut prej 28 anëtarësh, janë bërë veçanërisht të ndërlikuara që kur erdhi në pushtet Presidenti Francez Emmanuel Macron.
Shumë analistë thonë se marrëdhëniet e tilla midis Berlinit dhe Parisit po e dëmtojnë BE-në në një kohë kur ajo duhet të tregojë një front të bashkuar kundrejt fuqive të tjera botërore, të tilla si Shtetet e Bashkuara dhe Kina.
Macron tha para disa ditësh se aleanca e NATO-s po përjetonte vdekje të trurit, duke hedhur dyshime mbi garancinë e saj kolektive, me anë të së cilës një sulm ndaj një anëtari është një sulm ndaj të gjithëve në NATO.
Merkel e “sulmoi” Macron duke thënë se ai kishte përdorur “fjalë drastike” dhe kishte reaguar shumë keq. Ajo e shihte NATO-n ndryshe.
Norbert Roettgen, një anëtar i demokratëve konservatorë të krishterë të Merkel (CDU) dhe kreu i komitetit parlamentar për çështje të jashtme, i tha të përditshmes Bild të Gjermanisë se ai e kuptonte kancelaren.
“Por e gjithë kjo nuk na ndihmon, ne duhet t’i çojmë marrëdhëniet me Francën në një rrugë konstruktive,” u shpreh ai për Bild.
“Për ta bërë këtë, ne jo gjithmonë duhet të presim propozimet e Macron”, tha ai, duke dhënë ide të tilla si një rrjet i përbashkët 5G për të dy vendet.
“Ne mund të shndërrohemi nga ‘riparuesi’ në një drejtues të ideve gjermano-franceze,” tha ai.
E përditshmja Bild citoi gjithashtu një artikull të New York Times ku thuhej se Merkel ishte shprehur kështu në 30 vjetorin e rënies së Murit të Berlinit.
“Unë e kuptoj dëshirën tuaj për politikë shkatërruese. Por jam lodhur. Gjithnjë e më shumë, unë duhet të ngjis së bashku ato që keni copëtuar ju, në mënyrë që ne pastaj të ulemi dhe të pimë çaj së bashku”.
VAZHDO TË LEXOSH MË TEPËR PËR TEMËN
“Makron po sillet si të ishte Zot”
“NATO po vdes”, edhe rusët mendojnë njësoj si Macron
“Macroni është i vetmuar, por ajo që çudit me veprimet e tij është…”
