Pasi Matteo Salvini i Italisë nuk e rrëzoi dot qeverinë e tij këtë gusht, duke mos arritur të detyrojë zgjedhje të reja, mendohej se ai kishte arritur fundin.
Por kushdo që mendon se fenomeni Salvini ka hedhur në erë veten e tij rrezikon të pësojë një tronditje.
Salvini, drejtuesi i Lidhjes, ka qenë larg vëmendjes këto ditë, i privuar nga statusi i tij si Ministër i Brendshëm dhe zëvendëskryeministër, por partia e tij është më e fortë se kurrë, thonë analistët.
Frika nga populistët duket se u zhduk pas zgjedhjeve për Parlamentin Evropian në maj, dhe kur ai u largua nga qeveria.
Në vend që të jetë një produkt i një populizmi ndërkufitar, rritja e tij reflekton rimodelimin e peizazhit politik Italian, dhe veçanërisht rrëzimin e Forza Italia të Silvio Berlusconit.
Sondazhet e fundit të opinioneve tregojnë se nëse nesër do të mbaheshin zgjedhjet, Salvini jo vetëm që do të bëhej lehtësisht kryeministër, por që një koalicion i Lidhjes, Vëllezërit post-fashistë të Italisë dhe pjesa tjetër e Forza Italia e Berlusconit do të kishin një shumicë absolute në parlament.
Salvini i dha fund koalicionit me Lëvizjen Pesë Yje gjatë verës, dhe tani ata janë bashkuar me Partinë Demokratike në qeveri.
Udhëheqësi i Lidhjes ka kërkuar vazhdimisht një “tronditje fiskale” për ekonominë e vendit. Këshilltarët thonë se ai zgjodhi t’i jepte fund koalicionit pikërisht sepse e dinte se do të ishte e pamundur të zbatoheshin këto masa në buxhetin e këtij viti.
Ndërsa koalicioni aktual po kalon një krizë të brendshme, Salvini është duke pritur fitoren në zgjedhjet rajonale në Emilia Romagna në janar, një rajon që përfaqëson zemrën e së majtës italiane.
Fitorja këtu, këshilltarët e partisë besojnë, do të ishte katalizatori për të rrëzuar qeverinë dhe për të detyruar mbajtjen e zgjedhjeve të reja kombëtare.
Salvini mund të jetë duke përgatitur një rikthim triumfues në Romë më shpejt nga sa pritet.
Nga Financial Times
VAZHDO TË LEXOSH MË TEPËR PËR TEMËN
“Salvini, politikani më i ngjashëm me Trump”
“Sardele”/ E gjithë Italia kundër Salvinit
“Evropa do të zhduket nën dallgët e populizmit”
