Tri penallti të humbura radhazi për të marrë vëmendjen e gjithë botës. Episodi ndodhi në Turqi, aty ku porta kundërshtare u kthye në një tabu për ekipin e Ergene Velimese.
Gjithçka ndodhi në ndeshjen e Ligës së Dytë në Turqi, në sfidën e fituar nga vendasit e Usakspor me shifrat 2-0. Ishte pikërisht fundi i takimit, ku gjyqtari akordoi një penallti në zonën e Usakspor dhe Ergene kishte shansin e mirë për të ngushtuar shifrat.
Diçka që nuk ndodhi, pavarësisht se aty u paraqiten plot 3 herë. Fillimisht ishte portieri Ersin Aydin që ndali në dy raste sulmuesin kundërshtar.
Goditjet e tij Aydin i neutralizoi me lehtësi, por gjyqtari kërkoi që të përsëritej. Lëvizjet e portierit u konsideruan si të parregullta nga ana e gjyqtari, duke i treguar edhe kartonin e kuq.
Pa asnjë portier rezervë të disponueshëm në pankinë, mes shtyllave u pozicionua mbrojtësi i Usakspor që duket se kishte studiuar çdo refleks të një portieri.
Ai mundi të neutralizoi edhe goditjen e tretë nga pika e bardhë e penalltisë, duke u shndërruar në një hero të vërtetë për të tijtë, që morën një tjetër fitore dramatike për ecurinë e sezonit.