Më 10 janar, në “Air Albania” u luajtën ndeshjet e yjeve të Shqipërisë, Italisë, Turqisë dhe Greqisë, një miniturne që kaloi më së miri dhe fitoi Italia.
Sindikata e Futbollistëve Shqiptarë bën publike se ka përfunduar proçesi i arkëtimit të kontributeve financiare për familjet e prekura nga tërmeti shkatërrimtar i 26 nëntorit.
Në një njoftim në faqen zyrtare në “Facebook”, SFSH-ja bën me dije se shuma përfundimtarë e arkëtuar është 5.591.775 lekë të reja, të cilat do të bëhen transparente për publikun.
Këto para do të ndihmojnë në rikonstruksionin e banesave të shkatërruara nga tërmeti.
NJOFTIMI I SFSH-SË:
Sindikata e Futbollistëve Profesionistë Shqiptarë informon me shumë kënaqësi se ka përfunduar procesi i arkëtimit të të ardhurave nga shitja e biletave për turneun miqësor që zhvilluam këtë janar.
Kjo në kuadër të mbledhjes së fondeve për bamirësi, me qëllim ndihmën e komunitetit të prekur nga tërmeti i rëndë që ra në vendin tonë në nëntor.
Shuma totale e përfituar nga ata që ishin atë ditë të pranishëm në stadium është 5.591.775 lekë të reja. Duke dashur të falënderojmë edhe njëherë atë pjesë të publikut që e ndjeu dhe qëndroi atë ditë nëpër shkallë, një falënderim i ngrohtë i shkon për të gjithë sindikatat homologe që erdhën e morën pjesë.
Përshëndesim të gjithë ish lojtarët e Kombëtares që kontribuan në këtë event me shpenzimet e tyre dhe padiskutim Federatën Shqiptare të Futbollit që mundësoi impiantin për të ofruar një mbrëmje sa më komode.
VAZHDO TË LEXOSH MË TEPËR PËR TEMËN
